VIKTORIA PA PUEBLO BONERIANO BOYCOT MASAAL TA MENSAHE FUERTE PA POLITKONAN LOKAL I HULANDES.

Kralendijk,- E partispashon hopi abow resiente na e elekshonan di 2de kamer na Boneiru ta un “wake-up call” kla I raspa pa e politikonan di Boneiru.

E pueblo no a entrega i no a sukumbi na preshon ku e politikonan lokal di MPB, DP, UPB i M21 a pone riba nan pa bai vota. E posishon heroiko di e pueblo ta mustra un determinashon renobá pa sigui e lucha kontra e opreshon dor di 2de Kamer na Den Haag desde 2010. Tambe ta protehá e referéndum di 2015 pa pone Boneiru bek riba e lista di protekshon di e Nashonan Uni. E ta un mensahe mas fuerte ku kualkier slogan di kampaña o komunikado prensa: e pueblo ta kontra e gobernashon impone di 2de Kamer.

E “wake-up call” aki tin varios nivelnan. E partisipashon abow ta mustra ku hopi Boneriano no ta sinti konektá ku e politika lokal i hulandes — nan no ta kere ku nan voto lo por trese kambio real. Pa hopi hende, no vota a bira un akto silensioso di protesta.

Lidernan lokal: hipokresia kla I evidente

Tambe tin un kontradikshon flagrante den e politika lokal. Simannan anterior di e elekshon, politikonan di Boneiru a bai Aruba, Kòrsou i St. Maarten i a kondena Den Haag pa ta tumando desishonan mayor sin gobiernu lokal. Pero durante e elekshon siman pasa, e mes politikonan di Boneiru aki a insistí na e pueblo — hopi agresivo  — pa vota pa e mes un partidonan I politikonan hulandes ku nan a kaba kondena. E akshon aki solamente a profundisa e divishon den e pueblo di Boneiru i a revela un liderazgo di hipokresia i sin prinsipio. E partisipashon abow no ta ignoransia o indiferensia — e ta un mensahe. Ta un rechazo di e sistema I kultura politiko aktual i di e liderazgo. E pueblo ta reklamando, honestidat, responsabilidat i representashon real. E ta un “wake-up call” pa tur lider na Boneiru pa reflekshona, rekonektá i rekonstruí konfianza.

2012 – 2025: No vota -boykot komo resistensia organisa

Desde 2012, James Finies a urgí Bonerianonan pa no vota den e elekshonan parlamentario holandes, argumentando ku partisipa solamente ta legitimisa un status politiko impone — I no un eskoho demokratiko real. E la organisá kampañanan anti-2de Kamer na 2012 (https://youtu.be/OzyJXdUp-N0?si=KzvEETIc_sVKHMvF), 2017 i 2021, ofresiendo opshonnan pa voto di protesta ku nan mes karchi di votashon hulandes. (https://youtu.be/Kv_uVChdp00?si=0_BhdcobBPoAbtgR) E akshonan aki a yuda mantene e partisipashon abow den kareda di 20%  pa mas ku un dekada.  

Desde 10-10-10, e status di Boneiru komo “entidat públiko” a redusí autonomia lokal i a subordina e isla na desishonnan unilateral for di Den Haag. Finies ta argumenta ku votando, Bonerianonan lo ta Indika i duna konsentimentu na e struktura aki, i debilita nan derechonan I lucha pa autodeterminashon. Su yamada — “tira bo karchi di votashon afo” I “no vota” — tabata pa mustra komo protesta polítiko, no komo desinteres.

Ku tempu, e tendensia di partisipashon abow ta mustra ku hopi hende ta konsiente. No vota a bira un akshon deliberá di resistensia — no desinteres pasivo — pero un rechazo pa no legitimisa un areglo polítiko impone sin konsentimentu di e pueblo.

Media no ta raporta e historia real

 E kobertura di prensa — spesialmente den e media Hulandes — ku titularnan ku Partido X o Partido Y  “a gana na Boneiru” no ta reflehá e situashon na Boneiru. Ku e partisipashon asina abow, ta manipulativo I asta engañoso pa pretende ku algun partido a gana e sosten di e pueblo di Boneiru. Hopi hende deliberadamente no a partisipá komo forma di protesta silensioso. Bonerianonan deliberadamente a keda lew for di urna — rechazando tur e partidonan i un biaha mas rechazando e sistema impone riba nan pa ta wordu goberná pa 2de Kamer.

E ganador real: e pueblo di Boneiru

E ganador real tabata e pueblo di Boneiru, ku a demostra resiliensia i resistensia. Nan a soportá I no a sukumbi na preshon kontinuo, kampañanan manipulativo, debatenan i insistensia kontinou pa vota — for di e pueblo su mes gobierno i politikonan I tambe esnan di Hulanda, dor di figuranan prinsipal di komunidat I medionan di komunikashon i medionan sosial, di famia i amigunan komo agentenan , dor di autoridadnan religioso, di lidernan di sektor priva, i inkluso e gezaghebber, ku a wordu  husa komo instrumento polítiko kontra e pueblo di Boneiru.

FUENTE: JAMES FINIES