Redakshon
Kralendijk,- James Finies, lider di Pueblo Progresivo Uni, i Davika Bissessar Shaw, presidente di Bonaire Human Rights Organization, a tuma parti resientemente den e Dialogo di Nivel Haltu “Hustisia pa Afrikano i Hendenan di Desendensia Afrikano via Reparashon” na e Sede di e Nashonan Uni na New York.
E evento aki tabata organisá pa Ofisina di Delegado Spesial di Nashonan Uni pa Asunto Afrikano (OSAA), e Presidente di e Asemblea General di e Nashonan Uni (PGA), i e Mishon Permanente di Union Afrikano na Nashonan Uni (AUPOM). E evento a konta ku partisipashon di Sekretario General di Nashonan Uni – António Guterres, Presidente di Asamblea General – Philemon Yang, i Presidente di Union Afrikano -Mahmoud Ali Youssouf. E evento a uni lidernan global pa avansá hustisia reparatorio i desaroyo sostenibel pa Afrika i su Diaspora.
James Finies di Boneiru a tuma palabra den e reunion ku un deklarashon huntu ku representantenan di paisnan miembro.
Speech:
Reparashon di Dignidat Humano pa Hendenan di Desendensia Afrikano den Karibe – E Pueblo ku a wordu lubida atras.
Haití a habri e kaminda pa reparashon di dignidat i dekolonisashon den e kontinente Amerikano na aña 1804. Mas ku dos siglo despues, e pueblo di Boneiru ta sigui bou di gobernashon kolonial sin solushon. Ochenta anja despues di kreashon di Nasionnan Uni, nos ta lanza un apelashon urgente: pueblo di Boneiru ta enfrentándo desaparishon di nos kultura i identidat étniko.
Boneiru, un isla ku ta solamente 50 miya for di kosta di Venezuela, a wordu integrá unilateralmente den un struktura konstitushonal kolonial oropeo na aña 2010—kontra e boluntat di su pueblo i bou di kondishon legal desigual. For di e momentu ey, lei ku no ta reflehá nos balornan o identidat a wordu impone riba nos.
Un di e mas preokupante ta e ley di eutanasia—un práktika ku ta kontrario ku nos profundo respet pa bida.
Ochenta porshento di Bonerianonan tin desendensia Afrikano. Pa nos, eutanasia no ta un akto di kompashon, sino un violashon di bida.
Nos pueblo a rechaza e ley aki públikamente i konstantemente, pasobra e ta kontra nos prinsipionan étiko, religioso i kultural. Apesar di e oposishon masal, e ley aki a wordu impone sin sin konsentimiento I aprobashon, via gobernashon kolonial.
E konsekuensianan a resulta profundo. For di su introdukshon, e tasa di morto na Boneiru a dobel. Mas alarmante aún ta e kambio demográfiko: nos poblashon nativo a baha di 80% prome ku 2010 pa mas o ménos 30% awe. Pa komparashon, na Palestina—despues di dèkadanan di konflikto—e bahada ta mas o ménos 6%. Na Boneiru, un bahada di 50% den un dekada—sin bom of bala, pero via manehonan I leynan ku ta ignora nos humanidat.
E lucha aki no por wordu separá for di e legado di sklabitut transatlántiko, kolonialismo i sistemanan ekstraktivo ku a devastá Afrika i su diaspora.
Manera Chimamanda Ngozi Adichie ta adverti: “ignorando historia, ta hasi bo siegu pa e presente”. E desaroyonan, retonan, di awe tin nan raís den siglonan di opreshon i gobernashon impone. Berdadero hustisia mester di un struktura di reparashon ku ta restaurá dignidat i duna poder bek na komunidatnan manera nos pa reklamá nos kontrol kultural, ekonomiko i polítiko. Desaroyo sostenibel no ta posibel sin hustisia, inklushon i autodeterminashon.
Awe nos ta un minoria riba nos mes tera ansestral, enfrentando un peliger grandi di desaparishon kultural. Esaki ta kolonialismo moderno— silensioso, sistemátiko i profundamente destruktivo.
Nos rekomendashon: Nos ta hasi un yamada na komunidat internashonal pa pone prioridad riba rekonosementu i dekolonisashon di teritorionan manera Boneiru, komo parti di e agenda global pa hustisia reparatorio.
Tur ser humano ta nase liber i igual den dignidat i derecho. Nos tambe—e pueblo di Boneiru.
Nos no ta permiti pa silensia nos voz.
Nos ta hasi un yamada na mundu pa sostene nos den nos lucha pa hustisia, pa reparashon, i pa reklamá nos derecho pa bida, dignidat i autodeterminashon.
FUENTE: JAMES FINIES LIDER DI PUEBLO PROGRESIVO UNI
GIPHY App Key not set. Please check settings