Redakshon
Kralendijk,- A lanta Union Sindikal Boneriano den aña 2012 ku e meta prinsipal pa e klase trahadó boneriano haña un bos, un rekonosementu, un rèspèt pa loke ta trata desaroyo sosial-ekonómiko di nos isla.
Ela lanta tambe pa trese un balansa di poder riba e merkado laboral i asina evitá eksplotashon i abuso kontra e klase trahadó. Pa logra e meta aki USIBO a akseptá e reto pa huntu ku gobièrnu di Boneiru aserká sektor empresarial, esta dunadónan di trabou pa lanta un plataforma tripartit ku regularmente ta dialogá riba temanan di importansia pa henter nos komunidat.
Na komienso tur sindikato a uni forsa pa realmente i sinseramente den solidaridat traha huntu pa e kousa di e klase trahadó.
Nos arma prinsipal tabata i ta te ainda diálogo, union den pensamentu i union den akshon i forsa di konvikshon a base di argumentunan bon fundá. I kaminda ta nesesario nos ta usa nos derecho konstitushonal pa yama pueblo den solidaridat pa realisá un meta komun, esta kibra e kadena di pobresa i esaki ku éksito.
Pa loke ta e aspekto sosial USIBO ku orguyo por mira bèk riba logronan signifikativo pero alabes por trese dilanti ku tin logronan signifikativo nos dilanti pa loke ta trata hustisia sosial, pero tambe logronan riba tereno di modernisashon di nos leinan laboral.
Un rapòrt resien a indiká ku sindikalismo su aporte den un forma profeshonal i asertivo tabatin komo resultado un kresementu formal i supstansial di miembresia den sindikato riba nos isla. E kantidat di CAO-nan a krese supstansial i ta demonstrá un oumento positivo di e konsiensia serka e trahadó ku UNION ta FORSA i ku su interesnan ta mihó sirbí ora e ta organisá den un sindikato.
Pues USIBO a demonstrá su derecho kompleto di eksistensia i ta keda e garantia pa e bos, e rekonosementu i e rèspèt ku e klase trahadó meresé.
USIBO komo bos di e klase trahadó tin komo tarea tambe eduká i forma e klase trahadó i asina enrikesé su persona ku konosementu.
Un di e konosementu ta nos propio historia sindikal di Antia en general i esun di Boneiru en partikular. Tur aña di nobo riba 1 di mei nos ta rekordá luchanan sindikal i di lidernan sindikal riba nivel internashonal ku a bosiferá inhustisia kontra e klase trahadó i hasta a sakrifiká ku nan libertat i bida pa e kousa aki.
Sinembargo nos a bin ta tuma nota ku no ta duna atenshon na nos propio historia sindikal i na nos propio lider- i trahadónan ku tambe a bosiferá inhustisia kontra e klase trahadó ku sakrifisionan personal i a paga ku pèrdnan trabou, paga ku nan libertat i hasta tin ku a pèrdè nan bida den e lucha.
En bista di esaki, USIBO a tuma e inisiativa pa instituí un rekonosimentu visibel i tangibel pa duna e rekonosimentu aki i pa e tin un karakter duradero den nos historia sindikal na Boneiru.
Nos konosé diferente forma ku por rekonosé un trahadó, manera entre otro un simpel sertifikado di rekonosimentu, un chapi di lucha(rekordando por ehèmpel e lucha di Martis Cathalina Janga di Boneiru), promové un miembro pa miembro di honor, pone krans na esnan ku ya no ta ku nos mas, ets. Un di e bareranan ku trahadó ta enfrentá pa e ehersé libremente su derecho di afiliá na un sindikato (un derecho fundamental humano ankrá den nos konstitushon i rekonosé riba nivel mundial) ta e kadena di miedo i kobardia ku tin e trahadó mentalmente preso i ku ta e sombra ku kada biaha e tin ku trata na bula.
E rekonosementu ku USIBO ta bai duna ta netamente pa sirbi komo modelo, komo ehèmpel pa e klase trahadó ku mester kibra e kadena i bula e sombra di miedo i kobardia pa realmente mentalmente e tahadó ta un hòmber/muhé liber i ku e por ta rekonosé i respetá komo igual den su relashon di trabou.
Pa tal rason USIBO a skohe pa usa e símbolo di e YABI DI KURASHI. I djabièrnè awor den presensia di direktiva di USIBO su konseheronan i den presensia di prensa boneriano lo tin e seremonia ofishal di e entrega di e YABI di KURASHI na un nominado. Den nos edishon di djaluna awor nos lo amplia riba esaki.
FUENTE: NÒCHI WILLEM/LIVE99FM
GIPHY App Key not set. Please check settings