KOMISHON HERENSIA KULTURAL RINCON TA MIRA BÈK KU ORGUYO RIBA UN OTRO EDISHON EKSITOSO DI DIA DI RINCON.  

Kralendijk,- Komo komishon organisado di Dia di Rincon nos ke gradisi tur patrosinadó, bishitante i sostenedó ku a yuda pa hasi e evento di e aña aki no solamente posibel, sino berdaderamente eksepshonal.

Nos ke gradisi espesialmente Entidat Públiko Boneiru pa e sosten kontinuo, tambe na tur e diferente kompania i organisashonnan ku a sa di duna nan granito pa por hasi e manifestashon kultural aki posibel.

Un danki di kurason ta bai na tur kolaboradó i boluntarionan, inkluyendo miembro di komishon i sup-komishon, ponedónan di stent, organisadónan di eventonan durante e luna, bandanan musikal , aktor nan di e teater na aire liber, gruponan di folklor, artistanan, MC i kolaboradornan di ensenario i tur wapado.

Nos ta gradisí nos bishitantenan di e isla rumannan i bishitantenan internashonal ku a biaha pa Boneiru pa partisipá den e selebrashon. Boso presensia a enrikesé e eksperensia i a demostrá e poder di union den kultura i tradishon.

Un gradisimentu i hopi apresio na Rinkoneronan ku a sa un biaha mas di ta tremendo anfitrionnan pa nos bishitantenan.

Miéntras nos ta reflehá riba e evento di e aña aki, Komishon Herensia Kultural Rincon ta realisando un evaluashon kompletu di e organisashon i e logístika, partikularmente riba e medidanan di seguridat ku a ser implementá. Nos ta komprometé pa mehorá e esfuersonan aki pa garantisá ku e edishonnan den futuro di Dia di Rincon ta keda seif i inklusivo, mientrastantu ta mantené firmemente nos rais den tradishon i herensia ku ta duna e dia aki su nifikashon.

Ku bista riba futuro, nos ta deseá pa sigui traha huntu pa Dia di Rincon 2026 ta aun mas eksitoso.

Huntu, lo nos sigui honra e legado di Rincon, protehá su identidat kultural, i krea eksperensianan inolvidabel pa tur ku ta partisipá.

FUENTE: KOMISHON HERENSIA KULTURAL/LIVE99FM