TUR KAMINDA KU BO BIRA BO TA TENDE KU KOSNAN TA STANKÁ

Kralendijk,- Frakshon di MPB a tuma nota di algun komunikado ku miembronan di frakshon di Demokrat. Nos ta puntra nos mes ta riba kua planeta e hendenan aki ta biba?

Nan no ta skucha tur e reklamonan ku tin den tur skina ku bo bira na Boneiru? Ora ku bo mira e kantidat di biaha ku e hendenan aki ta subi avion pa bai keiru, uzando sèn di pueblo, e ora ei bo ta kaba komprondé ku ta p’esei nan no sa ta kiko ta pasando riba Boneiru pasó kasi nunka nan no t’ei.

Den un di e komunikadonan nos a lesa algu ku a pasa pa promé biaha den historia. Gobièrnu ta broma ku nan a basha poko tera riba algun kaminda.

Drechamentu di kaminda ku greis ta algu ku tur tempu tabata sosodé strukturalmente i outomátikamente. Pa e gobièrnu aki si ta un logro grandi. Komprendibel, pasó nada no ta pasando i ta esei so a keda pa broma kuné.

Organisashonnan lokal tambe ta sklama

Frakshon di Demokrat mester stop di kue direkshon di aeropuerto i duna direkshon na gobièrnu. Lo ta bon pa e frakshon di Demokrat tuma tempu i sinta ku organisashonnan i atendé ku problemanan serio ku Boneiru ta konfrontando.

Stop di sinta hasi prèt, manda komunikado pa oposishon. Bai atendé ku dolornan di pueblo manera :

• Piskabon ku ta reklamá
• Bonhata ku ta reklamá
• Kompanianan di konstrukshon ku ta reklamá
• Sektor di kultura ku ta reklamá
• Diálogo sentral ku ta reklamá
• CFT ku ta reklamá
• Prensa ku ta reklamá
• Gruponan di ‘dragrace’ ku ta reklamá
• Shofùrnan di trùk ku ta reklamá

Pa koroná obra ta manda piskadónan subi waf pa bai buska nan pan di kada dia pero riba nan propio responsabilidat pasó e waf pa kai den otro.

Preis di kuminda i koriente inpagabel

Preisnan den supermerkado ta subiendo drástikamente. Tin hende ku mester di 2 trabou pa por sobrebibí. Awor te hasta bo ta mira hende ta kana ku ‘calculator’ den man ora di hasi kompra pa nan konta tur kos bon, sperando ku nan tin sufisiente sèn pa por kumpra tur loke ku nan mester. Muchanan ta sintá den outo pafó di supermerkado, pasó mamanan sa ku si e yu baha ora nan ta hasi kompra, e yu ta bai pidi mangel pero e sèn no ta yega pa kumpra nada èkstra.

Awor ku e tarifanan di importashon di Trump mas ainda nos ta teme kiko lo bira e desaroyo di preis di kuminda diario.

Pa hasi e situashon di famianan pió, preis di koriente a bira dòbel na komienso di e aña akí. Un hende ku antes tabata paga $100 pa koriente, awor ta paga $200. Esakinan ta puntonan ku Demokrat mester bai atendé kuné i stop di kore tras di oposishon.

Loke ku e gobièrnu anterior tabata hasi, nos ta proponé pa sigui ku ne:

1. Bin ku un supsidio di parti di gobièrnu di Boneiru pa baha preis di koriente pa asina trese un alivio. Esaki ta algu ku a yega di sosodé na aña 2022 kaba, ora ku gobièrnu a duna un supsidio na WEB pa baha preis di koriente.

2. Bin ku un makutu básiko ku preis máksimo i asina trata na frena e subida di preis di kompras.

Si gobièrnu no hasi nada frakshon di MPB lo bin ku un proposishon pa pone un supsidio pa WEB pa baha preis di koriente. Nos no por laga preisnan sigui subi asina’ki i keda sin hasi nada. Nos ta spera ku otro miembronan tambe lo para tras di e inisiativa akí pa yuda pueblo i stòp di bin ku weganan polítiko ku no ta yuda pueblo ku nada.

FUENTE: FRAKSHON MPB/LIVE99FM