GOBIERNU DEN KRISIS?

Kralendijk,- Siman pasa eks diputado Thielman a drenta ku un furia di masbangu komo miembro nobo di Konseho Insular.

Den su diskurso ku a parse un debate politiko a indika ku lo tin krisis den gobernashon.

Ultimo tempu e eks diputadonan Thielman i Kroon ta sali kontinuamente i bisa ku gobiernu no ta hasi nada, ku tur kos ta pega i ku e gobiernu ta den krisis. E lidernan aki no sa miho, ku ta keda tira mentira den laira p’asina purba na manipula e pueblo!

Mientras ku sigur despues di 10-10-10 politika a kambia!!

Un politiko ku a bai ku tempu mester sa ku awor mas ku nunka, ku tur politiko no ta importa di kua partido, mester traha huntu p’asina logra lo maksimo for di Hulanda!

Pero mientras ku ta sigui riba e sistema bieu i saka mentira, Hulanda ta laga nos sigui kaba ku otro, mientras ku nan si ta pasa Boneiru tur tipo di ‘fast ball’.

Awor laga mi bai pa e gritu di e eks diputadonan ku ta zona manera disko raya, ‘”Nada no ta kana” i ku “Gobiernu ta den krisis”!

Si nada no ta sosode? Dikon gobiernu ta drechando kaminda di Rincon? Gobiernu a drecha entre otro Kaya Apelsina i otronan na Rincon ku e GOBIERNU DI EEKS DIPUTADONAN ku ta grita den desierto NO a drecha! Ta e gobiernu aki ta bai drecha e kaminda di Broertje Janga, ku no por a keda kla kune pa drech’e den e ultimo 25 afianan di gobernashon.

Siendo den krisis konforme Konsehal Thielman, E GOBIERNU aki a logra tur loke mi ta bai menshona.

E Gobiernu aki:

A traha un velt multifunshonal ku ta yama Noki na Nort Salina; A drecha na e velt di Elion Flores;

A drecha lus i kancha nan di bich nobo ku santu na Rudy Boezem; A a organisa Sport Expo

A drecha e waf na parke Toeloei;

A drecha rondo di i e kancha di beisbol; A drecha e kaminda nan di tera na Hato; A drecha kaminda di Airport;

A lanta e supsidio pa deporte p’asina mas organisashonnan deportivo por bai kometi pafo di Boneiru i drecha e lokual nan ku mester den nan organisashon.

A hisa montante aki di $120.000 pa kasi $500.000. Dor di lanta e supsidio aki, por mira mas logro den deporte tantu lokal komo internashonal.

I ta djis un par di e proyektonan di e gobiernu aki!

E echo ku e lidernan politikonan aki ta grita ku nada no a sosode i ku gobiernu ta den krisis, ta pasobra nan ta kontra ku e gobiernu nobo aki ta traha na bienestar die Pueblo di Boneiru. I ku porfin nos hendenan ta

risibiendo loke nan tin derecho riba dje i ku e bolo ta keda parti dor di tur nos hendenan. I sigur e departamento di deporte ta risibiendo hopi atenshon despues di e negligensia di parti di e gobiernu anterior.

Mi kier konseha e eks diputadonan Thielman i Kroon ku awor ta miembronan di Konseho Insular, pa kambia e forma di hasi politika bieu i antikua pa esun di e tempu aki.

BAN traha pa Boneiru!

Ban traha pa un Boneiru HUSTU i DURADERO!!!!

FUENTE: ROLANDA HELLBURG-MAKAAI LIDER DI FRAKSHON PDB.