MOSHONNAN IN-EHEKUTABEL POR KONDUSÍ NA KONFUSHON BOU DI E PUEBLO DI BONEIRU I FRUSTRASHON BOU DI INSTITUTONAN EHEKUTIVO.

Kralendijk,- Mi no sa e intenshon di sra. Coffie i mi no a mira e moshon tampoko pero en general mi tin ku bisa pa legalisá cannabis pa uzo rekreativo òf kultivo lokal no ta posibel den kuadro legal aktual.

Aunke na hopi lugá rònt di mundu tin diskushon tokante e tópiko di cannabis, e Reino Hulandes ta partido di e tratado internashonal di Nashonnan Uní di 1961 tokante supstansia adiktivo. E tratado aki ta obligá paisnan pa prohibí supstansiannan manera cannabis, ku eksepshon pa uzo medisinal òf pa investigashon siéntifiko. E obligashonnan aki ta bálido pa Boneiru tambe.

Ademàs di esaki, lei penal i regulashon tokante suptansiannan adiktivo ta den man di Gobièrnu Hulandés (Den Haag). Un Entidat Públiko no tin outoridat pa desviá for di Lei di Opio BES òf e tratado internashonal menshoná.

Mientrastantu e legislashon nashonal i e obligashonnan internashonal no kambia, no ta pèrmití pa legalisá cannabis pa uzo rekreativo òf pèrmití kultivo lokal fuera di e reglanan pa uzo medisinal.

Atrobe mi tin ku bisa ku mi no sa si e moshon aki ta diripente a bin kuné sin ku gobièrnu òf otronan por a duna nan komentario promé.

Prosesonan di bon gobernashon ta preskribí ku tópikonan asina mester keda diskutí ampliamente i e informashon korekto mester keda suministrá.

E gobièrnu di Boneiru tampoko no por bin ku un maneho di toleransia tumando na kuenta e hecho ku un desishon asina ta un desishon di Ministerio Públiko pa no pèrsiguí sierto ofensanan penal aktivamente pero esei no ta kita afó ku e ofensanan aki ta keda formalmente kastigabel.

E entidat públiko tampoko no tin outoridat i palabra riba e lei penal i tampoko tin outoridat riba Ministerio Públiko ku ta kai bou di e ministerio di Hustisia i Seguridat na Hulanda. E entidat públiko no tin outoridat pa bin ku ordenansa i regla pa tolerá sierto aktonan penal.

Miembronan di konseho insular tin un responsabilidat pa bin ku proposishonnan realístiko i legalmente sano. Moshonnan in-ehekutabel por kondusí na konfushon bou di e pueblo di Boneiru i frustrashon bou di institutonan ehekutivo.

Mester sòru pa kada moshon den e área aki ta legalmente faktibel, ta wòrdu atendé korektamente atministrativamente, i ta duna un kontribushon signifikante na e debate públiko.

Awor si sra. Coffie kier tumba gobièrnu, esei ta den su man, pero mi no ta kere ta hustu i responsabel pa hunga ku e sentimentunan di e pueblo pa ventilá frustrashon riba e gobièrnu aktual.

FUENTE: WILLEM CECILIA/LIVE99FM