Redakshon
WILLEMSTAD – Den un setting úniko na Kòrsou a trese funshonarionan di tur sinku kuerpo polisial den Reino Hulandes hunto pa e proyekto piloto Strategia di Reino War Room. Recherche Samenwerkingsteam (RST), Koninklijke Marechaussee (KMar) i Guardakosta Karibense (KWCARIB) tambe ta partisipá den e inisiativa spesial aki, ku ta destiná pa fortalesé e lucha konhunto kontra krimen transnashonal i krimen ku ta mina struktura di e komunidat.
War Room ta den man di e koordinadó di e Plataforma di Koordinashon di Informashon Interinsular (IICP), lokual ta un kolaborashon struktural entre e organisashonnan partisipante i Ministerio Públiko, enfoká riba tereno di informashon. E koordinadó ta haña apoyo di e liaison officer di Polis Nashonal Hulandes i e koordinadó di Koordinashon di Informashon Karibense (ICC-NL).
E término War Room ta bini for di mundu militar, kaminda e ta referí na un espasio sentral destiná pa desaroyá strategia i koordiná operashonnan. Den e pilot aki, e konsepto ta haña un otro kontenido: durante di dos siman – di 31 di mart te 11 di aprel 2025 – analistanan i ekspertonan den informashon lo traha intensivamente hunto pa identifiká i analisá retnan kriminal ku ta aktivo den mas pais den Reino. E material di informashon ku a traha konhuntamente den e War Room por sirbi komo base pa investigashon penal òf otro tipo di intervenshon. E proyekto piloto ta sirbi tambe komo un entrenamentu práktiko pa analistanan nobo den e kuerponan di polis Karibense i RST.
E Hefe di Polis di Kòrsou Raymond Ellis, na nòmber di e Kolegio di Hefenan di Polis, a habri e War Room ofisialmente, huntu ku Hefe di RST, Ans Rietstra. Segun Ellis, e inisiativa “ta un fase nobo den kolaborashon den Reino”. Segun Hefe Polisial Ellis, no ta un koinsidensia ku a skohe pa traha den e setting di un War Room.
“E lucha kontra di kriminalidat organisá mas i mas ta parse un tipo di guera moderno. E lucha ei ta tuma lugá den nos haf, aeropuerto, riba kaya i riba internet. Nos oponente ta organisá nan mes kada bes mas mihó, ta traha sin problema hunto krusando frontera, ta uza teknologia avansá i tin un posishon di informashon fuerte. Esaki ta nifiká ku nos tambe mester organisá nos mes mas mihó, pusha limitenan pa kooperá mas ku otro i fortifiká nos mes posishon di informashon.” E Hefe di RST a ekspresá su apresio i sosten pa e proyekto piloto, i a bisa ku e tin konfiansa ku e War Room lo duna bon bista den prosesonan di moda ku ta yega na resultadonan importante.
E inisiativa aki ta demostrá ku instansianan ku ta enkargá ku mantenshon di lei den henter Reino no solamente ke traha huntu kontra di kriminalidat organisá, pero tambe ta transformá e deseo aki den akshon konkreto. No ta trata solamente di un proyekto piloto: esaki ta un señal fuerte di union i rekonosementu di urgensia pa hiba e lucha kontra krimen ku ta mina nos komunidat.
Ta spera ku e método ku ta eksplorá durante e simannan aki lo sirbi komo base pa un kolaborashon struktural i duradero.
FUENTE: KOLEGIO DI HEFENAN DI POLIS/LIVE99FM
GIPHY App Key not set. Please check settings