RIBA INISIATIVA DI DIREKTIVA DI ABVO-BONEIRU E SINDIKATONAN ABVO, AFBW. FEDEBON, NAPB-BES I SIMABO A REUNÍ YA PA 3 BIAHA KABA TOKANTE E TEMA SELEBRASHON DIA DI OBRERO. 

Kralendijk,- ABVO ta hopi kontentu i gradesido na e sindikatonan ku a aseptá e invitashon pa e reunionnan. Meta di e reunionnan tabata primeramente pa sondia e posibilidat pa konhuntamente selebrá dia di Obrero e aña aki.

Despues di deliberashonnan breve entre direktivanan di kada sindikato, tur direktiva a mustra interes pa selebrá dia di Obrero e aña aki den union ku otro bou di e lema “ Uni nos ta Vense”.   

Dia di Obrero, tambe konosí komo Dia di Labor òf Dia Internashonal di Trahadó, ta un dia liber pa lei. Dia di Obrero ta kai anualmente, den mayoria di pais, riba dia promé di mei. E ta e dia ku ta konmemorá tur baluarte ku a lucha pa mehorá kondishonnan di trabou i duna balor na sindikatonan di tur sektor

For di 1817, e empresario ingles Owens a boga pa un dia di trabou di 8 ora so. Na 1884 e “Federation of Labor”, un federashon sindikal merikano, ta pasa un resolushon i for di mei 1886 a introdusí e lei ku un dia di trabou ta 8 ora i tabata selebrá dia di Obrero.

Na Boneiru ta selebrá dia di Obrero dia promé di mei. E selebrashon lo bai ta den un forma di drive thru. Tur miembro di e sindikatonan lo risibí mail òf app ku informashon tokante e selebrashon di dia di Obrero.

Por último direktiva di ABVO-Boneiru ta yama un danki fraternal na sindikato AFBW, FEDEBON, NAPB-BES, SIMABO, NAPB-BES i STrAF pa a, i ta trahando huntu pa ku e selebrashon di dia di Obrero

FUENTE: ABVO/LIVE99FM