FUNDASHON “MOK” A LA KARGA KU KANTO KRIOYO 2025.

Kralendijk,- Manera ya ta konosí, nos ta aserkando e luna tan sperá, ku ta e luna di selebrashon di Dia di Rincon 2025.

Fundashon MOK ku ta enkargá ku organisashon di Festival Kanto Krioyo, tantu grandi komo hubenil, ya ta a la karga ku preparashonnan pa ku e proximo Kanto Krioyo. E aña aki esaki lo tuma luga di 9 te ku 12 di Aprel 2025. Programashon:

• 23 di Mart: Inskripshon Grandi
• 9 di Aprel: Prome anochi pre-eliminar 
• 10 di Aprel: Di dos anochi pre-eliminar 
• 11 di Aprel: Kanto Krioyo Hubenil 2025
• 12 di Aprel: Anochí final di Kanto Krioyo Grandi 2025

Lo ta un siman di hopi musika original krioyo, kaminda ku nos artistanan ta bin expresá nan kreashonnan riba tereno musikal krioyo.

Festival Kanto Krioyo Hubenil

Manera por a ripará e aña aki Kanto Krioyo Hubenil ta riba un djabièrnè i no djadumingu manera kustumber. 

Djadumingu 13 di Aprel ta inisio di siman santu, esta “Domingu di Rama” (Palmzondag). Pa e motibu aki Fundashon MOK a opta pa organisa e festival hubenil riba diabièrnè 11 di Aprel 2025, esta riba e dia ku normalmente lo mester tabata liber pa Festival Kanto Krioyo.

Tambe Fundashon MOK e aña aki a forma dos banda hubenil independiente ku lo bai kompañá tur nos partisipantenan Hubenil. Esaki mirando ku tin kantantenan ku kier partisipa, pero ku no por haña banda pa kompaña nan, alabes pa garantisá ku den futuro nos Kanto Krioyo Grandi ta sigui eksistí ku 3 anochi di festival. Asina aki mas kantante por haña chèns i banda pa por partisipa na nos festivalnan.

Di e manera aki nos hobennan lo haña oportunidat pa nan profilá i forma nan mes pa asina garantisá ku den futuro nan lo por sigui karga e musika krioyo.

Inskripshon Hubenil

Ya nos organisashon ta bezig kaba ku preparashonnan pa ku training di e 2 bandanan hubenil aki. Inskripshon lo habri djadumingu awor 9 di Mart 2025 i ultimo dia pa inskribí lo ta djamars 11 di Mart 2025, pa 5’or di atardi.

Hobennan lo por inskribí via di un ‘link’ riba nos pagina di Facebook: Festival Kanto Krioyo.

Pa mas tardá diabièrnè 14 di Mart e komposishonnan i melodia mester ta entregá na Fundashon MOK, ya asina por kuminsa mas rápido posibel ku e trainingnan.

Por entrega komposishon via di nos e-mail: kanto.krioyo@gmail.com  Sigui nos riba nos paginanan social, pa mas informashon.

Saludos Krioyo,

FUENTE: FUNDASHON MUSIKA ORIGINAL KRIOYO /LIVE99FM