UNTAHF A LAGA E PUEBLO KONFUNDI I DESAPUNTA

Boneiru a enfrenta un situashon bochornoso ku ta mustra un falta di balor i konsiderashon pa nos mes kultura i nos íkono nan kultural. E manera skandaloso den kua a trata Riginald ‘El Gran Tiri’ Trinidad, “Tata di Tumba,” pa e homemaje a kousa di desorganisashon i falta di konsiderashon, kousa ku no por wordu repone.

Konfushon ku “50 aña di Karnaval”

A pone e situashon ahun mas prekupante, ta bisto ku e promoshon di “karnaval 50” ta basa riba informashon inkorekto. Segun FUHIKUBO, karnaval na Boneiru a kuminsá den dekada di 1960 na Rincon, mientras ku Tumba a kuminsá den 1975. E promoshon a pone e komunidat i turista den konfushon, pasobra no ta klaro kiko a wordu selebrá di e manera ku e a keda presenta. Si ta trata di 50 aña di Tumba, e promoshon mester ta kla i korekto. Pero e manera ku e informashon ta wordu presentá ta un falta di respet pa nos historia i ta propaganda un mentira ku a dañá nos identidat. Si tabata kiermen ta e Tumba ta selebra 50 aña huntu ku Karnaval, anto mester a promove “Tumba ta selebra 50 aña ku Karnaval” i no “Karnaval 50”.

E desorganisashon ta bisto:

Aktividatnan importante, manera e marcha di despedida ku Momito pa grupo nan di mucha a keda kanselá. Marcha a pasa sin Momito. No tabatin Momito.

Sekshon di Kultura, Arte i Literatura – SKAL

Dikon un organisashon (UNTAHF) di 90% of mas di persona di otro isla ta dirigí nos kultura? Esei tambe ta un punto ku a lanta indignashon, e echo ku organisashon UNTAHF ta 90% of mas di persona nan di isla Kòrsou, ku a tuma kontrol riba nos selebrashonnan kultural.

Dikon Boneiru ta permití ku otronan ku no ta yu Tera ta bin diktá kon nos mester selebrá nos mes historia? Nos tin ekspertonan lokal ku konose nos tradishon i historia, pero nan ta wordu margina. Esaki ta un falta di balor pa nos mes kapasidat i un traishon na nos identidat.

Basta ku keda ketu

Bonerianonan, ta tempu pa nos lanta nos bos. Basta ku keda ketu ora kos nan ta bai malu. Basta ku laga otronan tuma kontrol riba nos tradishon i dignidat kultural.

Eksigí:

1.Respet pa nos íkono nan kultural: Un homenaje mester ta digno, ku preparashon i konsiderashon.

2.Balor pa ekspertonan lokal: Nos tin hendenan ku konose nos historia; duna nan e oportunidat i apresio pa yuda of dirigi den organisashonanan asina aki.

3.Informashon korekto: Stòp ku propagandá error, siña nos hubentut e berdadero historia di Boneiru.

4.Liderato lokal: Honora hendenan lokal ku sa di nos kultura i su historia pa hasi tipo di trabou nan asinaki. Tin un diferensha entre kultura di e islanan; nos mester siña atende ku nos mes aktividatnan kultural, sin dependé di personanan di otro isla.

Nos historia ta di nos. Si nos no protehá nos mes, ken lo hasi esaki pa nos? Nos historia i tradishon ta di nos, i nos tin e gran responsabilidad pa transmití nan ku amor i orguyo pa e generashonnan ku ta bini.

Basta ku desrespet i desorganisashon. Boneiru mester siña balorá su mes hendenan i trata nan ku dignidat ku nan meresé.

Boneiru tin hende ku si por traha ku kritika konstruktivo i no konstruktivo tambe ku tin etiká pa rekshona riba kada kritika. No ta paso e komishon anterior a faya den esaki nan,ta nifika ku Boneiru no tin mas organisashon ku lo por hasi e aktividat aki. Den pasado, nos tabatin organisashon di nos mes hende nan ku a sa di karga nos aktividat Karnaval hopi bon sin niun problema.

Boneiru, lanta bos i defende bo kultura. Basta ku keda ketu. Nos íkono nan, nos tradishon i nos historia ta balioso, i nos no por sigui laga nan wordu trata manera si nan no tin importansia. Organisashon UNTAHF a laga e pueblo hopi konfundi i desapunta.

E pueblo tur konfundi i desapunta kier pidi Sekshon di Kultura, Arte i Literatura – SKAL pa pone den funshon nan tema ku nan ta trese semper dilant ku ta: Mantene, protehá, desaroyá i promové nos herensia kultural.