UN PABIEN NA E 22 TRAHADÓNAN DI CONTOUR GLOBAL KU NAN VOTO SI A PONE KU TUR 30 TRAHADÓ DI CONTOUR GLOBAL AWERÓ LO TA BAI TIN BENEFISIO DI UN KONTRAKTO KOLEKTIVO.

Kralendijk,- Un CAO ku AFBW lo mester negoshá ku gerensia di Contour Global. Naturalmente e deseo di e trahadónan lo ta e base di e negosashonnan miéntras ku e punto di salida mester ta ku kondishonnan laboral atkerí mester keda en takto.

I mirando e eksperensha ku AFBW a akumulá atraves di e añanan serando no ménos ku 21 CAO i asisti pa huristanan di taya no por tin duda ku e tim di negoshadó lo bai mesa bon prepará. E proseso ku ta bai sigui awor ta ku Contour Global lo mester firma un akuerdo di rekonosimentu formal di AFBW komo e úniko representante legal pa atendé interesnan laboral di e trahadónan i tambe mester firma un protokòl di negosashon den kua ta stipulá e proseso i proseduranan di negoshá. AFBW lo mester presentá un CAO den konsepto, di moda ku e negosashonnan por kuminsá. Mi ta deseá ambos partido tur sabiduria i ku rèspèt mutuo lo ta e fundeshi di e negosashonnan.

Manera ya anunsiá, sindikalismo na Boneiru ta den transishon pa bai di e fase di boluntarismo pa profeshonalismo. Pa guia e transishon aki den bon kaminda i duné un karakter duradero nos lo mester bai na invertí den kalidat di e trabou sindikal. Sindikato lo no por esaki riba su so. Ta probá kon importante ta pa tin un bon partner di negosashon na e otro banda di mesa. Pa tal rason sindikalismo lo mester bai na aserká su partnernan, esta gobièrnu i dunadónan di trabou, pa un sosten finansiero struktural .

Nos kier yega na un areglo ku ta trese un solushon na e base di e tema. I esei ta ku e pago di kontribushon di e miembronan tambe ta bai pa trahadónan ku no ta miembro, ya ku una bes sera un CAO na un empresa esei ta konta pa tur trahadó ku ta kai bou di e CAO, sea miembro o no miembro. I a base di un akuerdo ku mester sera ainda e dunadó di trabou lo bai paga un kontribushon na e sindikato pa kada trahadó di su empresa.

Ta depositá e kontribushon den un fondo di formashon speshal lantá pa esaki. Dos kondishon ta di vital importansha den e fondo, esta ku ta bin un areglo ku lo no por usa e fondo pa metanan di akshonnan sindikal òf aktividatnan ekivalente.

Ku esei ta sigurá e dunadó di trabou ku ta usa e fondo realmente pa alsa kalidat di funshonamentu di e sindikato. Tambe no ta usa e fondo pa privilegiá o benefisiá miembronan di e sindikato. Esaki ta un kondishon hopi importante ya ku e kontribushon ta dirigí pa kompensá e sindikato pa negoshá pa tur trahadó den e empresa.

Lo usa e fondo pa formashon di personal di kader i aki nos por pensa den direkshon di shopstewardnan bon prepará riba flur di trabou, bon negoshadónan na momento di negoshá kondishonnan laboral ku konosimentu basal di derecho laboral, ekonomia i kon merkado ta funshoná, ets, pero tambe kursonan pa funshonnan den direktiva mas seshonnan di informashon i konsientisashon di miembronan en general pa loke ta nan derecho- i debernan ankrá den nan konvenio di trabou.

1 di mei 2025 DIA DI LABOR INTERNASHONAL. Sindikalismo di Boneiru tin un kompromiso serio ku e klase trahadó pa tene aktividat riba e dia ei pa konmemorá e lucha di e klase trahadó ku ta un lucha kontinuo.

Loke nos tin awe, nos mester konservá, miéntras ku mester fortifiká e UNION di e klase trahadó ku kontinuamente ta bou di menasa. Si bo no ta lider sindikal pa sirbi e kousa bo no ta sirbi pa ta lider sindikal.

FUENTE: NÒCHI WILLEM/LIVE99FM