Kralendijk,- Presidente di ABVO-Boneiru, Tafila Janga a kuminsá na gradisí tur miembro di ABVO-Boneiru pa nan presensia.
Tafila Janga a duna un relato kòrtiku riba e programa di ABVO-Boneiru pa e aña 2025. ABVO-Boneiru ta para dilanti un aña nobo karga ku hopi reto. E reto di mas grandi ta pa organisá un konseho / kongreso na Bonaire. Pa por logra esaki ABVO-Boneiru ta konta ku sosten di su miembronan. Un otro reto ta organisá i forma gruponan di servisio na tur e entidatnan kaminada ABVO-Boneiru tin representashon.
“Aña pasa ABVO-Boneiru a kuminsá ku e trayekto pa forma gruponan di servisio i a organisá elekshon pa skohe representantenan pa e grupo di servisio na BIA. Ku e mishon pa sigui fortifiká komunikashon na i entre e miembronan, direktiva di ABVO-Boneiru ta hasi un yamada na tur miembro pa konhuntamente, nos kana e trayekto pa ABVO-Boneiru tin su representantenan legalmente skohé pa kada grupo di servisio.”
Pa aña 2025, ABVO-Boneiru tin un programa di formashon riba diferente tereno di desaroyo personal i edukativo pa su miembronan, i nan famia. Lo organisá kursonan dirigí riba leinan laboral i di herensia, aktividat edukativo pa yunan di miembro, krea fasilidat pa miembronan por sigui kurso na nivel di HBO.
Den e programa di 2025, direktiva ABVO-Boneiru ta pone hopi énfasis riba formashon di lidernan sindikal. Den e kuadro aki lo organista diferente kurso pa prepará lidernan sindikal na tur nivel. Tur esakinan ta na bienestar di nos miembronan. Ku partisipashon i sosten di miembronan direktiva ABVO-Boneiru lo logra muchu mas benefisio na interes di tur miembro di ABVO-Boneiru.
Por último Tafila Janga ta tira un bista riba logronan mas prinsipal ku a keda realisá den aña 2024.
- Direktiva ABVO-Boneiru a firma akuerdonan laboral pa empleado na RCN i OLB,
- Na OLB ABVO-Boneiru a logra pa OLB paga e miembresia di tur trahadónan di OLB.
- Na RCN a firma un adaptashon di e akuerdo laboral pa e próksimo aña 2025 i 2026,
- Na BIA a firma un adaptashon/kambio di algun kondishon sekundario di trabou pa e próksimo periodo di e CAO,
- Pa e personal ku ta traha den enseñansa a sera un akuerdo laboral pa 2024 i a palabra ku lo kuminsá ku negashonnan na 2025.
Pa terminá Tafila Janga ta yama un danki spesial na su tim Boneriano ku ta Joanny Trinidad i Rudsel Leito.
Un danki na presidente George Hernandez, Sekretario di organisashon Gregory Wilsoe i nos konsehero Roland Nacho Ignacio ku tambe a bin selebrá e anochi aki huntu ku nos, na bosnan danki pa e sosten.
Sra. Tafila Janga ta klousurá su spich gradisiendo miembronan presente.
FUENTE: ABVO-BONAIRE/LIVE99FM



GIPHY App Key not set. Please check settings