REAKSHON RIBA KOMUNIKADO DI M21 TOKANTE E PROSESO PA AKTUALISÁ E DATABASE DI KLIENTE DI CUROIL BONAIRE

Kralendijk,- En konekshon ku un komunikado di M21 tokante e proseso pa aktualisá nos database di kliente, Curoil Bonaire ta informá lo siguiente:

Na yüni 2024, Curoil Bonaire a start ku un proseso pa aktualisá nos database di kliente, ku meta pa sigui mehorá nos servisio i sigurá ku e datonan di nos klientenan ta korektamente registrá i ‘up to date’. Un registrashon korekto di nos klientela ta di suma importansia, tantu pa inovashonnan ku nos lo introdusí den futuro komo pa prevení mal uso.

Durante e proseso pa aktualisá nos database di kliente, nos a tuma nota ku tin algun kliente ku no ta korektamente registrá den nos sistema. Esaki por ta relashoná ku diferente faktor manera dokumentonan ku falta, klientenan ku a muda pa un otro adrès i no a informá Curoil Bonaire di e mudansa, òf habitantenan nobo na un adrès kaminda ya tin instalashon di gas riba nòmber di un otro kliente. Nos ke enfatisá ku den e kasonan aki, Curoil Bonaire no ta deskontinuá servisio. Huntu ku e kliente semper nos ta buska un solushon apropiá pa kompletá e registrashon di manera korekto. Curoil Bonaire ta lamentá ku durante e proseso pa aktualisá su database, por a surgi kualke konfushon òf inkumbiniensia serka nos klientenan.

Komo e úniko proveedor di produkto di gas na Boneiru, Curoil Bonaire ta konsiente di su responsabilidat pa ku su klientenan. Nos ta sigui komprometé pa ofresé un servisio konfiabel i di kalidat, i nos ta traha huntu ku nos klientenan pa resolvé kualke iregularidat òf keho.

Pa Curoil Bonaire lamentablemente no ta posibel pa trata kada kaso individual den media. Nos ta hasi petishon na nos klientenan ku tin kualke pregunta i/òf keho, pa tuma kontakto ku nos via nos numbernan di telefòn 717-7022, 717-7025 òf 717-7027, pa asina nos por yega na un solushon apropiá huntu ku e kliente.

FUENTE:CUROIL/LIVE99FM