MPB A ENTREGA KARTA NA GEZAGHEBER RELASHONA KU E DESISHON DI REPRESENTANTE DI REINO PA KITA TAREA FOR DI KOLEGIO EHEKUTIVO I ASUMÍ E RESPONSABILIDAT

Apresiabel Gezaghèber Soliano,

Riba djabièrnè 15 di novèmber nos a tuma nota di e desishon di Representante di Reino pa kita tarea for di Kolegio Ehekutivo i asumí e responsabilidat riba algun tarea pa loke ta trata maneho di sushi na Boneiru.

Nos ta lamentá ku mester a yega asina leu ku mester kita un tarea for di gobièrnu di Boneiru.

E argumentunan di Representante di Reino kontra gobièrnu di Boneiru ta pisá i e desishon ku el a tuma ta unu grandi. Nos vishon semper tabata ku gobièrnu di Boneiru mester por tuma mas responsabilidat enbes di pèrdè tarea ku Hulanda, pero al final nos ta sostené tur loke ku ta mas mihó pa habitantenan di Boneiru. Spesialmente pa e habitantenan di Lagun i bisindario nos ta kere ku e situashon a eskalá di tal forma ku e intervenshon di Hulanda por yuda e hendenan akí.

Pa e trayekto akí kana bon pa e habitantenan i pa e repartishon di tarea ta komprendibel pa tur hende, nos ta kere ta importante pa tin algun punto bon kla pa tur partido. Di nos banda nos ta kere ku Representante di Reino i gobièrnu di Boneiru mester pone e habitantenan na promé lugá. No mester bai den un diskushon den korte awor akí, pasobra esaki ta bai prolongá e situashon i kita e enfoke for di e meta prinsipal, esta: bin ku un solushon di manera ku habitantenan di Lagun i bisindario por biba seif, trankil i salú den nan kas.

Mirando ku e situashon a eskalá di tal forma ku den un aña di tempu mester a evakuá habitantenan for di nan kas dos diferente biaha, mester atende riba término kòrtiku ku e asuntu akí, pero tambe riba termino largu pa buska un solushon duradero. Nos ta keda kere ku mester reforsá Selibon komo organisashon i sòru pa e ekspertisio i fondonan nesesario ta disponibel pa e desaroyonan di futuro. Nos kier atvertí tambe ku si dado kaso tin kompanianan di afó ta bini pa atendé ku tareanan di Selibon, Selibon mester keda e kompania den liderazgo sí. No mester ta asina ku un kompania djafó ta yega i tuma Selibon òf su tareanan over.

Serka nos a keda varios pregunta atras i ta importante pa rápidamente bin klarifikashon den e asuntu akí, pa kada partido sa kiko nan tin na otro. Nos ta hasi uso di nos derecho konforme art. 45 di reglamentu di ordu pa hasi pregunta por eskrito na gezaghèber.

Den e desishon di Representante di Reino e ta menshoná ku e lo asumí e responsabilidat riba petishon di permit di Selibon i pa soru pa atendé ku e partinan kaminda Selibon no ta kumpli ku nan permit. Relashoná ku esaki tin algun pregunta a keda tras serka nos:

1. Ken lo tuma e responsabilidat di salubridat públiko den e kaso spesífiko di habitantenan di Lagun i bisindario?
2. Ki dia pueblo lo por risibi di parti di Representante di Reino un plan di aserkamentu, kombiná ku un planifikashon pa loke ta trata e tareanan ku e ta bai asumí akí?
3. Kiko ta verwagt di parti di gobièrnu di Boneiru ainda den e trayekto akí?
4. Kuantu sèn ta premirá ku ta bai tin mester i pa ki dia lo por haña esei?
5. Kiko ta e kriterionan ku tin pa na final por bisa ku e trayekto akí tabata unu eksitoso i ku por pasa e tareanan bèk den man di gobièrnu di Boneiru?

Na mes momento nos kier duna sugerensia tambe pa krea un taskforce di ámbos gobièrnu pa atendé ku e situashon akí. Nos kier sugerí tambe pa laga Gezaghèber ta esun ku ta trèk e trayekto akí i semanalmente keda den kontakto ku Representante di Reino tokante e desaroyonan.

Nos ta konsiente ku Gezaghèber mes lo no por kontestá tur e preguntanan. Nos ta supliká Gezaghèber pa aserká Representante di Reino pa haña kontesta riba e preguntanan en kestion i pa duna un reakshon por eskrito riba e karta akí.

FUENTE:MPB/LIVE99FM