“TEMPUS MUTATA” TA NIFIKÁ TEMPU A KAMBIA,

Kralendijk,- Bonaire despues di 10-10-10 a drenta un proseso aselerá i e kambio grandi ta  sintá den kresementu di e poblashon.

Den e desaroyo aki te ainda no tin un debate públiko pa no papia mes di konseho Insular. Loke ta resaltá ta diskushon ku tiramentu di falta, akusashon, egoismo, alabansa personal i humiá esnan ku no ta di bo grupo pa sasia vengansa djis pa haña rason.

Tur esakinan ta sosodé bou di e famoso libertat di ekspreshon. Mi ta aploudí e inisiativa pa bini ku un programa ku puntonan general manera libertat di ekspreshon, responsabilidat, igualdat, rèspèt pa fortalesé fundeshinan di demokrasia ku e formashon básiko hiba debate.

Esaki ta un kondishon sumamente importante pa kontradisí e diskushonnan sin ningun klase di argumentashon. Mi ta partidario pa e programa logra pa yega na siudadano di estado ku por formulá opinion, no solamente pensamentu, riba tópikonan na Bonaire manera; salubridat, enseñansa, kuido, naturalesa, imigrashon, orientashon seksual, forsa di kompra, turismo, bibienda, infrastruktura, pobresa, transporte públiko, funshonamentu di kolegio Ehekutivo, di Konseho insular, di kompanianan gubernamental, sindikato, mesa di klima, impakto di sklabitut, kolonialismo, rasismo, diskriminashon, medionan sosial i komunikashon. Un menasa grandi ta media sosial ku informashonnan populista.

Pa debatí mester tin konosementu di e materianan menshoná no na skol so pero den henter komunidat. Debate ta eksigí argumento pa supstansiá un ponensia i komprondé kontra argumento.

E base pa siña argumentá i komprondé fundeshi di demokrasia ta filosofia. Un ehèmpel riba kua no tin debate ta e siguiente.

Diputado Angelica su ponensia ta ku tereno ta un privilegio i no un derecho. Ta bèrdat ku no por eksigí di hues pa un siudadano haña tereno, pero kiko ta nifiká privilegio.

Esei ta loke yama arbitrario i ta bai kontra regla di bon gobernashon. Ta nifiká ku ta duna tereno na esun ku e Kolegio Ehekutivo ke. Sea ta mantené òf amplia korupshon ku ta tilda otro partidonan. di dje. Mi ponensia ta; Ser un siudadano fuerte,  kritiko i demokrátiko no ta un privilegio, pero ser un diputado, gezaghèber, konsehal si ta un privilegio 

FUENTE:ARTHUR SEALY/LIVE99FM