KORSOU: KOMPRA DI INSTRUMÈNT METEOROLÓGIKO PA AEROPUERTO

Willemstad,- Meteo tabata di bishita na un kompania Finlandes Vaisala, relashoná ku kompra di un sistema Meteorológiko pa aviashon pa realisá e FAT( Factory Acceptance Test).

Servisio Meteorológiko Kòrsou komo outoridat nashonal ta suministrá nos aeropuerto ku diferente informashon Meteorológiko pa asina garantisá seguridat i efisiensia pa aviashon. Informashon di wer severo, bientu i temperatura ta di vital importansia pa subida i bahada di avion i tambe operashon na nos aeropuerto. 

Den e kuadro aki e kompania Finlandes Vaisala a wòrdu otorgá e enkargo pa entrega Meteo Kòrsou un sistema ku ta outomatisá sierto produktonan.

Pa e motibu aki algun miembro di Maneho di Meteo a biaha pa Finlandia pa analisá i aprobá e sistema i tambe evaluá e sentro di entrenamentu tékniko.

Finalmente a firma konhuntamente ku e hefe di proyekto e asina yama FAT. Den luna di yanüari 2025, spesialistanan tékniko di e kompania Vaisala lo ta na Kòrsou pa instalashon di e sistema aki. Meteo i minister di VVRP ta sigui invertí den seguridat di nos komunidat.

FUENTE: METEO KORSOU/LIVE99FM