KOMISHON HERENSIA KULTURAL A INISIÁ PREPARASHONNAN PA DIA DI RINCON 2025 I TIN ALGUN PARTISIPASHON IMPORTANTE

Kralendijk,- Komishon Herensia Kultural, e organisashon enkargá ku e organisashon di e selebrashon anual di Dia di Rincon, ta anunsiá ku preparashonnan pa Dia di Rincon 2025 a kuminsá ofisialmente.

E manifestashon kultural, ku tin rais profundo den kultura di Rincon, lo sigui uní nos komunidat pa un luna yená ku tradishon, muzik i folklor.

Notisia Importante tokante Uso di Logo i Bandera

Nos ke pidi atenshon riba e echo ku tur pèrmit otorgá anteriormente pa uso di e bandera di Rincon i e logo “R” ofisial ta kanselá pa final di 2024. Pa edishon di 2025, lo no duna ningun pèrmit nobo pa uso di e símbolonan aki. E desishon aki ta tuma pa protegá e identidat di e evento i preservá su outentisidat.

Yamada pa Partisipashon den Parada di Folklor

Komishon Herensia Kultural ta invitá tur grupo i organisashon ku ke partisipá den Parada di Folklor pa registrá nan partisipashon. Gruponan nobo I eksistente por manda un imeil na info@diadirincon.org. Ta sumamente importante ku e grupo nan tuma kontakto na tempu, pa asina nos por koordiná e informashonnan nesesario pa ku e parada.

Bo ke forma parti di e festividat?

Komishon Herensia Kultural ta gradesido pa e apoyo ku a risibí durante e aña nan pasá di tur e diferente sponsornan. Mirando ku e evento ta kresiendo i tin basta interes komo partner pa kontribuí. Komishon ke invitá empresanan i organisashonnan ku ke forma parti di Dia di Rincon pa mèldu esaki na komishon. Tin diferente manera pa yuda kontribuí na e gran evento aki. Pa esei Komishon Herensia Kultural ta organisá un enkuentro informativo. Durante e enkuentro aki, lo splika e diferente manera di partisipashon, vishon di e organisashon, kuadronan i otro informashon relevante pa yuda kontribuí na e éksito di e evento. Manda un imeil pa info@diadirincon.org pa indiká bo interes i nos lo manda un invitashon pa bo organisashon.

Yamada na Habitantenan di Rincon

Por último, nos ta hasi un yamada kordial na tur habitante di Rincon , e temporada ta serka I nos komo bario ta e anfitrion nan pa mundu kompleto bin selebrá nos kultura. Laga nos ban bek komo bario pa biba I ehersé nos responsabilidat pa ku nos bario. Apoyo di nos bario ta esensial pa logra ku e selebrashon ta un éksito i ku e ta reflehá nos orguyo kultural i union. Tur persona ku ke duna nan sosten, di kualke manera, ta invitá pa tuma kontakto i partisipá.

Huntu nos ta traha pa un Dia di Rincon 2025 inolvidabel.

FUENTE: KOMINSHON HERENSIA KULTURAL/LIVE99FM