BONKARATE KU OTRO BON RESULTADO.

Kralendijk,- Djaluna dia 28 di oktober un delegashon chikí di BonKarate a sali pa Santiago de Chile pa kompetí den kampionato Pan Amerikano senior di Wako i alabes den kampionato Sur amerikano Kader i Junior.

Despues di a pasa den e proseso ofisial di inskripshon kaminda tur dokumentu médiko i otro dokumentunan ofisial mester wordu entregá, a pasa pa e parti di pisamentu.

Djaweps e kompetensianan a kuminsá i a terminá djasabra atardi dia 2 di novèmber.

Pa BonKarate:

Raiza Wilsoe den su kompetensianan a logra sali na e di 4 lugá,

Esther de Jesus den su kategoria a logra sali na e di tres lugá,

Everon Vrutaal despues di bon kombatenan a logra sali na e di 3 lugá,

Kieyon Henriquez tambe despues di bon prestashon a logra sali na e di 3 lugá.

E kampionatonan tabata bon bishitá i a soru pa un bon kompetensia.

Asina mes Sensei Peter Silberie ta hopi satisfecho ku e prestashon di su atletanan.

Banda di e kompetensianan Sensei Peter Silberie a partisipá na e asamblea general di Wako i komo muestro di apresio el a haña un rekuerdo di e organisashon.

FUENTE:BONKARATE/LIVE99FM