M21 TA SELEBRÁ SU DI TRES ANIVERSARIO I TA TENE KONGRESO STATUTARIO DIA 4 DI ÒKTOBER PRÓKSIMO

Kralendijk,- Dia 1 di òktober 2024 M21 ta selebrá su di tres aniversario i ta organisá dia 4 di òktober su kongreso statutario anual. Lider di partido i di frakshon di M21, Daisy Coffie, ta reflehá riba e trayekto inkreibel ku e partido a eksperensiá durante e último tres aña.

Segun Coffie, M21 ta e promé i úniko partido ku ta basa su norma- i balornan riba un prinsipio sosial liberal.

“Tres aña pasá nos a tuma un paso den un mishon pa trese kambio signifikante pa suidadanonan di nos isla — un mishon ku ta fundá riba hustisia sosial, transparensia, inklusividat i progreso”, asina el a splika. Segun Coffie, e último añanan no tabata sin su retonan, i miéntras e partido  ta marka e aniversario aki, Daisy Coffie ta orguyoso di bisa ku M21 a kumpli ku su promesanan, i esei ta motibu pa selebrá.

Un di e logronan di mas grandi di M21 ta e impakto real ku e partido a krea, tantu komo oposishon i komo miembro di koalishon den Konseho Insular. M21 a keda konsistente­mente un forsa pa kambio positivo, spesialmente den áreanan esensial manera ekonomia, edukashon, medio ambiente, salubridat i urbanisashon. Pero M21 a enfoká partikularmente riba e relashonnan diplomátiko ku Hulanda i nos bisiñanan karibense, bienestar di hende i bestia i siguridat públiko. Tambe M21 a bria den e arena diplomá­tiko i polítiko i a logra fortalesé nos laso ku Hulanda, sigurando ku e bos di Boneiru ta keda respetá i skuchá riba un eskala mas amplio. Segun Coffie, e kapasidat pa fortale­sé esaki a pone M21 mas serka di Den Haag i Bruselas, pero tambe a permití gobièrnu pa lòbi mas efektivamente pa nesesidatnan i aspirashonnan di nos pueblo.

M21 a hunga un rol importante tambe den introdukshon di e lei di benefisio pa desempleo mihó konosí komo e ‘WW uitkering’, ku ta drenta na vigor na yanüari 2025, pa asina krea un reda di seguridat sosial pa tur suidadano. Tambe M21 a pusha, pa despues di hopi intento, porfin ta revisando legislashon di bienestar pa bestia riba nos isla. Alabes Coffie ta pushando den Konseho Insular pa introdusí medidanan pa komba­tí manehamentu bou di influensia di alkohol, un práktika peligroso ku a tuma demasiado bida den nos komunidat. 

Daisy Coffie tabatin e privilegio di liderá algun komishon klave i spesífikamente a fungi komo presidente di e Komishon di Selekshon pa e Grefir nobo i vise presidente di e Komi­shon pa selektá nos Gezaghèber nobo. Akí Coffie i e komishon tabatin e respon­sa­bili­dat di skohe lidernan ku ta reflehá nos balornan i nos dedikashon na servisio públiko. Ademas, Coffie a traha djaserka riba asuntunan relashoná ku revishon di WOLBES i FINBES, unda e  tabata lider di delegashon di Boneiru i di BES den e kumbre ku Sekretario di Estado van Huffelen. Akí M21 a sigurá ku gobièrnu a nabegá e kompleksidatnan di e kuadro legal i finansiero riba un manera efektivo ku resultadonan positivo.

Komo presidente di e Komishon di Trabou, (Werkgeverscommissie) Coffie a defendé polítika hustu i balansá, ku ta promové funshonamentu efektivo di tantu nos Grefi komo su trahadónan. Pa medio di komishon Relashonnan Interinsular i Reino, M21 a partisipá den diskushonnan signifikante ku nos partnernan regional i di Reino, fortifikando nos lasonan i sigurando ku huntu nos ta sigui pa dilanti.

Ora nos wak bèk riba esaki, ta kla ku e forsa di M21 ta den nos boluntat kolektivo pa sirbi i ta gradisido na henter direktiva di partido i tur miembro ku a sostené e ambishon akí. Segun Daisy Coffie e futuro di M21 ta basá riba tres kompromiso prinsipal, kual ta skucha pueblo, fortalesé i modernisá nos gobernashon, i semper pone interes di pueblo boneriano na promé lugá.

Resientemente nos a kompletá Tertuliando, un seri di podcast di 10 episodio ku a keda bon risibí – e promé riba nos isla – kaminda vários miembro di M21 a amplia tokante temanan relevante pa públiko. M21 ta dediká tambe pa fortalesé i modernisá e aparato gubernamental. Un gobernashon moderno no solamente ta mehorá e kalidat di servisio pa nos siudadanonan, pero lo oumentá nos kapasidat pa enfrentá e retonan di awe i mañan.

Daisy Coffie ta insistí ku kada desishon, maneho i paso ku M21 tuma lo ta na bienestar i prosperidat di nos pueblo. Nos relashon ku Reino ta krusial, pero nos mester sigui enfatisá ku esaki ta un relashon fundá riba rèspèt mutuo i kolaborashon. M21 lo sigui boga pa desaroyo ekonómiko, sostenibilidat ambiental, i outonomia, sigurá ku nos bos ta keda respeta i nos interesnan ta protehá.

Finalmente, Daisy Coffie ke gradisí pueblo pa su aporte inkondishonal i dedikashon na e kousa. M21 ta selebrá e momentu akí ku orguyo, pero tambe ku e komprenshon ku tin hopi mas trabou nos dilanti. Huntu M21 ta komprometé pa bira mas fuerte komo movementu politiko, demostrá liderazgo sin miedu, i sigui sirbi nos komunidat.

FUENTE:M21/LIVE99FM