JAMES ALBERTO KUATER AÑA KAMPION NA HULANDA

Kralendijk,- James Alberto un Boneriano de pura sepa, tremendo talento pa loke ta trata BMX Flatland.

Esei ta enserá hasi kenshi ku baiskel riba un flur. Pa 4 aña el a gara e premio máksimo den e deporte menshoná ku su baiskel. James a nase i lanta na Boneiru i na edat chikitu e i su Tata Marko i su Mama Magda, a bai biba na Sabana.

Na edat di hóben 14 pa 15 aña, huntu ku amigunan di bario i algun di otro barionan, nan tabata práktika e deporte.

For di edat mas chikitu, ya baiskel tabata parti di James su pashon. No solamente BMX Flatland, pero tambe nan tabata traha rampa di palu, loke James tabata lesa i mira den buki, krea nan propio fantasia. No tabatin otro forma pa sigui e deporte.

Nan a trein un tempu largu bula for di rampa, pero no tabata fásil i ta eksihí hopi kos ku na Boneiru no tabata posibel, desaroyá den e área aki, esta BMX Flatland. Esaki tabata sosodé na Sabana dilanti kas di su mayornan, kantu di kaminda.

Nan a bula na laman tambe ku baiskel, spesialmente na Chachacha Beach, pero komo plaser, no pa trein freestyle. James, hopi hende ku konosé bon, spesialmente su amigu nan di Bario Sabana, ta yam’e Yames. E tabata trein ku amigunan manera Gunther, Andre, Ramon, Edger, Fittipaldi.

Por kòrda un amigu tambe di bario Nort di Saliña. Esei ta algun, tabatin mas mucha ku tabata praktiká e deporte. Yames semper tabata superá loke nan tabata hasi.

E tabatin dos amigu merikano ku ainda e tin kontakto ku nan, ta trata di Chad i Scott. Nan tabata biba na Belnem. Mayoria biaha e treinen nan pa loke ta trata e parti di BMX Flatland, loke nos tabata yama ántes Freestyle, tabata dilanti Consales, e flur di betòn ku ainda tei. Otro banda di kaya tabata Fifoco, awendia Warehouse Bonaire Supermarket. E deporte a keda stanká i manera hopi kos na Boneiru, kada temporada tin su kos. Despues tur kos ta kaba na aros i koko. Kisas si esnan konserní e tempu aya, a mira e deseo di e hóbennan i a krea fasilidat pa nan, e deporte por a sigui. Otro kos ku a hunga un ròl tabata, piesa òf baiskel apropiá pa hasi e deporte. Un lugá ku tabata bende piesa òf baiskel mas dirigí pa loke ta trata kenshi riba baiskel, tabata un lugá parti nort di Torito Snack. E no a keda hopi tempu i despues un lugá ku tabata hopi aña atendé ku bendementu di baiskel i piesa, tabata Monchin, na Kaya Grandi. Awendia a traha un Shopping Mall yamá MG na e sitio. Tur esaki a pone ku e rango di deporte menshoná, a pasa pa otro mundu.

Plan pa krea fasilidat pa deporte di freestyle ku baiskel

Bon pa bisa, algun aña pasá a bini dilanti pa krea un parke pa freestyle ku baiskel i posibel BMX Flatland i krosmentu. A menshoná ofisialmente ku ta trata e área, pa e parke den bisindario di Beatrix School. Miéntras algun hóben a kuminsá praktiká freestyle ku baiskel na Boneiru e temporada aya, tur kos a keda solamente riba papel i for di boka, nada den bida real.

Yames a bai studia na Hulanda na 1993
“Mi a bai biba Hulanda na 1993, pa studia pa mener di skol. Despues di tres aña na Hulanda sin a atendé ku baiskel, mi a tende ku tabatin un kompetensia di e legendario Mat Hoffmani a opta pa bai wak. Na e momentu ei mi a bolbe haña gana pa kuminsá. Mi a bai kumpra un baiskel na un lugá, sin sa, despues e negoshi aki a bira un di mi spònsernan.”

Ta mas o ménos 3 aña despues ku el a bai biba na Hulanda. “Nan a pidi mi pa kompetí na Duitsland i for di einan mi a sigui i bira e mihó di Hulanda den BMX Flatland.”

Ainda apesar ku e ta riba 50 aña, e ta trein tres biaha pa siman. “Mi trabou tin dia tabata pisá na Hulanda, pero ku mi earpiece nan i mi baiskel despues di trabou na skol, mi ta relahá mi mes di e tenshon di e dia.”

Awor e ta na Boneiru, dunando lès kaminda el a bai skol na mucha i hóben.

4 aña dominá i mantené e posishon kampion na Hulanda.
“Pa 4 aña mi a dominá e posishon di kampion na Hulanda den

 BMX Flatland. Den pasado, 35 aña pasá, tabatin mas hóben ta práktika e deporte di BMX Flatland. E ta nifiká kenshi riba e baiskel, no freestyle ku baiskel òf kròsmentu ku baiskel. Mes kos ku tur deporte, e ta rekerí hopi treinen i bon kondishon. Dimes disiplina no por keda un banda. Bon pa bisa, e no ta amigu ku alkohòl.”

Yames tabata hopi aktivo ku su baiskel un temporada, asina bon, ku e tabatin 8 spònser. E tabata haña baiskel pòrnada, asina propagandá pa negoshinan ku su talento. Ketu bai e ta aktivo pero poko ménos ku tempu e tabata na Hulanda den tòp komo e mihó. Yames a bishita e tempu aya Papa Cornes School.

El a kaba studia na Hulanda i kuminsá duna lès aya. El a duna lès dilanti klas na SVO Parcours. Huntu ku su esposa Flory, manera ta bisa, nan a hupa pa Boneiru resientemente. Hulanda ta bon pero tin basta. Kas ta mihó. No solamente el a kompetí den BMX Flatland, pero Yames a para coach na diferente lugá den Europa i ku invitashon pa pronto na Mexico.

Tur esaki pasobra nan a tende di dje i sa ku e ta importante pa e deporte. Bon pa menshoná, Yames a lesa hopi buki i hende ku a lesa hopi buki, ta sabí. Pronto por mira presentashon di dje na Boneiru, pa e mustra kon un adulto riba 50 aña, e kampion di Hulanda, por dominá un baiskel asina bon. Úniko hende ku ta hasi e kenshi riba e nivel, ku e ta hasié.

Na Boneiru, Aruba, Kòrsou i na isla ariba, no tin niun hende por hasi loke e ta hasi, tampoko a logra tur e premionan ku e tin te awor. Por komprondé di Yames, ku na Barbados tin hende ku ta praktiká e deporte i tin bon nivel. Keda pendiente pa momentu e duna un show, laga esnan ku no konosé e deporte mira i sa kiko Yames por. Boneiru tin mas persona ku talento. Riba potrèt James Alberto ta trein na Tera Kòrá i algun di su trofeonan i logronan.    

FUENTE:FITTIPALDI PIETERSZ/LIVE99FM