UN TREMENDO KONGRESO DI PARTI DI FEDERASHON DI TRAHADÓNAN DI ARUBA

Kralendijk,-Un tremendo kongreso di parti di Federashon di Trahadónan di Aruba ku a konbiná nan kongreso statutario ku nan selebrashon di 60 aña di eksistensia.

USIBO tabata presente i tabatin e honor di a fungi komo direktiva ku a dirigí henter e kongreso.

Den un komunikado separá USIBO lo amplia riba e kontenido di e kongreso, su resultado i su klousura ku rekonosementu di lidernan sindikal Arubano pero tambe entrega di plaka di i ponementu di pin dor di nos guru sindikal, Ewald Abdul i presidente di USIBO, sra.

Mavis Abrahams na e direktiva nobo di FTA.

Nos a eksperenshá un sala yen di delegadonan di tur e kompanianan na unda FTA tin representashon, nos a eksperenshá un disiplina i dedikashon di e delegadonan aki di sinta dos dia largu i aktivamente debatí, diskutí i pa na final presentá moshonnan i resolushonnan ku e meta pa mehorá funshonamentu di nan sindikato. Na klousura di e dos dia e delegadonan pa medio di votashon a skohe nan direktiva nobo pa e próksimo periodo, kual direktiva lo ta presidí pa Hose”Jomar” Figaroa.

Sindikalismo a tuma nota ku a habri un ruta marítimo direkto entre Trinidad/Tobago i Aruba i Kòrsou. Esaki ta di aploudí ya ku e ta habri posibilidat pa habri relashonnan komersial entre e islanan menshoná ku lo por kondusí na preisnan rasonabel i bentahoso pa produktonan importá  Loke sindikalismo ta lamentá ta ku atrobe Boneiru a keda afó en bes ku nos tambe a drenta den e boto ei pa por a risibí importashon direktamente for di e pais di origen, den e kaso aki Trinidad i Tobago.

Nos lo ta mas ku kurioso pa sa ta dikon no a habri un ruta direkto entre Trinidad/Tobago i Boneiru. Loke nos ta mas kurioso pa sa si gobièrnu a hasi esfuerso i ki esfuerso a hasi pa logra e ruta direkto di Trinidad/Tobago aki pa Boneiru. Tabatin un enkuentro entre e servisio ekonómiko di Boneiru ku e importadónan di Boneiru pa a sinta huntu ku e kompania di transporte i evaluá kua ta tur e produktonan ku Trinidad/Tobago ta eksportá, nan preis, nan kalidat, garantia di entregá kontinuo  i otro datonan logístiko nesesari pa por tuma un desishon korekto??? Sindikalismo lo ta kurioso pa sa ki impakto esaki lo por tabatin riba nos kosto di bida si logra haña e produktonan direkto i no atrobe via un tersera. Akaso no ta esei vários biaha nos ta tende komo motibu pakiko nos bida ta karu aki, esta ku tur kos no ta bin direkto pero mester pasa via Kòrsou. Unda nos Konseho Insular a keda pa konsultá públikamente ku nos gobièru riba e tema aki. Akaso nan no ta risibiendio tur dia keho di konsumidónan ku bida dia pa dia ta bira mas karu i insoportabel? Akaso nan no ta realisá ku sam sam ku oumento di entrada mester kana un bon maneho pa kontené kosto di bida? No ta esei ta pará pretu riba blanku den nos Akuerdo di Kralendijk, esta ku lo kombatí pobresa en general, pero pobresa en partikular bou di esnan ku ta traha dor di oumentá e kompensashonnan sosial manera ònderstant, penshun di behes i sueldo minimo. No a palabrá ku alabes mester traha riba medidanan pa tene e desaroyo di kosto di bida bou di kòntròl, implementando entre otro ampliamentu di e makutu básiko ku produktonan saludabel. No a akordá tambe ku mester tin un kòntròl severo riba makutu básiko i ku mester maksimalisá e margen di ganashi. Ki dia ta entrodusí transporte públiko, amplia e supsidio di hür, konstruí kasnan pagabel pa tur sektor pero tambe amplia kasnan sosial. Importante tambe ta pa konsiderá stimulashon di produkshon di propio kuminda dor di stimulá plantashon, krio di bestia i peskeria. Lo ta bon pa nos mira e maneho aki tradusí den fondonan supstanshal riba presupuesto 2025 i esun di mas Aaña pa realmente desaroyá profeshonalmente e arianan di produkshon di kuminda aki. Sindikalismo lo bai vigilá ehekushon di e Akuerdo di Kralendijk mas skèrpi pa asina tur e trabounan i esfuersonan hasi pa krea mas bienestar den nos komunidat no resultá en bano.

FUENTE: NORWIN NÒCHI WILLEM/LIVE99FM