KORSOU: CFT TA APRESIÁ E MIHÓ PROSESAMENTU DI E RIESGONAN FINANSIERO DI CMC

Willemstad, – Kòrsou ta sigui e rekomendashon di Kolegio di supervishon finansiero Kòrsou i Sint Maarten (Cft) i ta reservá rekursonan adishonal den e proyekto presupuestario pa 2025 pa kompensá e eksplotashon defisitario di Curaçao Medical Center (CMC). Cft tin basta tempu ta urgi e pais pa inkorporá e riesgonan finansiero di e situashon finansiero delikado di e hospital den e presupuesto di pais di un manera korekto, i ta konsiderá e paso ku Gobièrnu di Kòrsou ta duna aktualmente ta algu positivo.

Den e proyekto presupuestario, Kòrsou ta elaborá ku mas detaye e direkshon di solushon pa e problemátika finansiero di CMC ku a presentá anteriormente. Apesar ku no a duna splikashon ainda pa tur e kompenentenan di e solushon, esaki ta un paso importante den direkshon di un eksplotashon duradero di e hospital. Na mes momentu, ainda e nesesidat pa reformá e paisahe di kuido ta grandi. Kòrsou ta gasta mas ku 13 porshento di e produkto nashonal bruto na kuido, dos biaha mas ku e promedio den Karibe. E gastunan haltu di kuido ta kontribui na e preshon haltu di impuestonan i primanan ku tin na Kòrsou. 

Maneho finansiero

Riba 10 i 11 di sèptèmber 2024, Cft a bishitá Kòrsou. E tema di e bishita aki tabata maneho finansiero. Den kòmbersashon ku e Konseho di Minister di Kòrsou, Cft a ekspresá su preokupashonnan tokante di e echo ku e mehorashon di e maneho finansiero di e pais no ta yega na e nivel antisipa. Apesar ku Kòrsou ta dunando pasonan apropiá, e meta di haña un deklarashon di kontrol aprobatorio tokante di e kuenta anual 2026 ta kore peliger. Cft a urgi Gobièrnu di Kòrsou pa hasi tur loke ta posibel pa permanentemente mehorá maneho finansiero.

Bon maneho finansiero ta importante pa pèrkurá ku ta empleá e rekursonan públiko di un manera efikas i korekto, sin malgastá ni abusá nan. Ademas, transparensia i hustifikashon anual tokante di e maneho (finansiero) ku a apliká, ta esensial pa un gobièrnu konfiabel. 

For di 2019, ku guia di e Roadmap pa un deklarashon di kontrol aprobatorio tokante di e kuenta anual 2026, Kòrsou ta traha riba e mehorashon di maneho finansiero. Cft ta mira progreso, pero tin peliger di retraso. Ku un priorisashon adekuá di medidanan, un empleo efikas di hende i rekursonan, i un kompromiso públiko duradero di e Konseho di Minister, Kòrsou ta kapas pa logra resultadonan.

Invershonnan

For di 2025, Kòrsou ta presupuestá un subida konsiderabel di invershonnan nobo, parsialmente finansiá mediante fiansanan kontratá serka Hulanda. Cft tin basta tempu ta pidi atenshon pa e nivel di invershon relativamente abou, i ta konsiderá ku esaki ta un desaroyo bon biní. Den e marko aki, Cft ta mustra riba e importansia di invershonnan ku ta ekonomikamente rèndabel i ku ta fortalesé e ekonomia di e pais. Cft ainda mester evaluá e intenshon pa kontratá fiansanan nobo. P’esei ta importante pa Kòrsou entregá mas pronto posibel e datonan tokante di e sektor kolektivo di e pais.

FUENTE:CFT/LIVE99FM