Redakshon
Kralendijk,- E organisashon Baku Initiative Group , den kolaborashon ku Bonaire Human Rights I Movementu Pa Kambio a organisa un konferensia internashonal na Baku, Azerbaijan ku fokus riba e situashon di Boneiru bao di gobernashon Hulandes desde 10-10-10. E Konferensia tabata titula “ E trajekto di Boneiru desde Baku pasando via Asamblea General di Nashonan Uni pa Outodeterminashon”
E evento a reuni miembronan di sosiedat sivil di Boneiru, James Finies, Davika Bissessar, Kaile Finies, Felipe Chago Melaan, Albertico Janga, Shahir Theodora, Rutsainy Holder I figuranan internashonal, inkluyendo ofisialnan manera Ambasador di Nashonan Uni Sr Fuller di Belize, professor di ley internashonal dr Brian-Cox komo enviado special di San Vicente I Grenadines, Youth Ambassador Sr Matai Zamuel di Surnam, Dr Scotland representante di sosiedat sivil pa Reino Unido I Karibe den e Komite Ehekutivo di Sosiedat Sivil di Nashonan Uni, Sr Jorge Garcia di Sekrataria General di COPPPAL di Mexico I tambe aktivistanan di derechonan humano, lidernan di NGO’s I ekspertonan riba dekolonisashon. Partisipashon notable di CARICOM I presidente di e Foro Permanente riba Hendenan di Desendensia Afrikano , Ambasador dr June Soomer di St Lucia. Di Azerbaijan a partisipa miembronan di parlamento di Azerbaijan, dean I professor I studiantenan di universidat. I 25 pa 30 medionan di komunikashon a kubri e eventonan. Dr Soomer, dr Brian-Cox, Ambasador di Nashonan Uni sr Fuller I James Finies a partisipa den un programa live na televishon nashonal di Azerbaijan.
E konferensia a ensera representashon di e identidat Boneriano, su aspirashonan, interkambiando strategianan ku lo benefisia futuro di nos isla I a highlight e lucha di Boneiru pa outodeterminashon I dekolonisashon ku e obhetivo prinsipal pa logra sosten pa pone Boneiru riba lista di teritorionan-sin-propio-gobernashon di nashonan uni. E rol di Azerbaijan komo anfitrion a enfatisa su influensia kresiendo den esfuersonan global kontra kolonialismo.
E partispantenan a ekspresa nan agradesimento na Baku Initiative Group pa organisa e konferensia I tambe na e pueblo di Azerbaijan pa nan sinsero amistad I hospitalidad.
Fuente: Bonaire Human Rights Organization/live99fm
GIPHY App Key not set. Please check settings