POR SOLUSHONÁ PROBLEMA DI FEVER I PUSTAMENTU RIBA KAYA

Kralendijk;-  Resientemente a sali den korant BONERIANO ku pustamentu ta un situashon preokupante riba via públiko na Boneiru. Algun pustadó ku motosaikel ta bini dilanti pa splika e kos korektamente. Sigur ta bèrdat último simannan, tin aktividat ilegal tumando lugá riba kaminda, Kaya IR. Randolph Statuis van Eps. Ta trata di ponementu di fever, no pustamentu. Pa klara esnan ku no konosé e deporte, pustamentu ta 2 vehíkulo ta kore banda di otro pa ékis distansia i ponementu di fever ta 1 òf mas vehíkulo ta drei rònt sker. Tin mas ku 1 aña sin pustamentu a tuma lugá na e sitio menshoná. No ta un sekreto ku tin hopi aña, ku aktividat ilegal tumando lugá na e sitio. A kuminsá den pasado ku pustamentu i awendia e bida di ponementu di fever a kue plasa.

Pista pa fever

Despues ku plenchi òf pista pa fever na Onima tabata kla, niun hende tabata bishita Kaya IR. Randolph Statuis van Eps, pa niun aktividat ilegal. Despues di algun luna na Onima, a bolbe bai Kaya IR. Randolph Statuis van Eps i sigui ku ponementu di fever. Asina a sigui un ratu na Onima un ratu riba e kaya menshoná, ilegalmente. E motibu ku e sentimentunan ta miksto, ta sinti ku kada bes tin un estorbo, sea no mag kiko, ken ta bai organisá kos ilegal riba pista na Onima, òf a saka poster, propagandá, pa loke no ta permití. Pues bèrdat tin un pista temporal pa pone fever na altura di Onima, pero kos no ta kana bon. Atenshon ta solamente riba otro deporte, komosifuera esun di fever nota interesante. Den e pensamentu ei, no ta hasi nada pa yuda esnan ku ta praktiká e deporte di pustamentu òf ponementu di fever.

Meta di pista na Onima    

Na 2022 e tempu ei diputado James Kroon a sinta ku e tim di drihuk i a yega na e idea pa traha un pista di dragrace, esta na papiamentu bisá, pista pa pustamentu. Esaki pa kita e aktividat ilegal na Kaya IR. Randolph Statuis van Eps i ponementu di fever i bochincha aki aya. A menshoná ku na luna di desèmber 2022 e pista ta kla. Kos a bai mas largu i na 2023 luna di sèptèmber, dia di Boneiru a hasi apertura di e pista pa fever na onima, ku e meta pa na final di 2024, pista pa pustamentu i e pista definitivo pa fever, mas grandi,tambe ta kla òf den proseso. Storia largu hasi kòrtiku. Diputado James i Hennyson Thielman, no ta na e posishon mas i aktualmente Clark Abraham ta riba e stul, pa tuma desishon i el a bisa na diferente okashon públikamente, “Niun kaminda no tin nèt nèt nada ku ta indiká ku ta bai òf mester traha un pista. Pió sèn pa e proyekto.”

Pregunta di parti di esnan ku ta den mundu di pista pa fever i dragrace

E pregunta ta, ken ta gaña? E diputado di 2 aña pasá, polis, gezaghèber di e tempu aya òf e polítiko aktual? Loke Clark ta bisa ta fásil, pasobra niun drègdó òf ponedó di fever no por wak den kaha di gobièrnu òf diputadonan, si tin dokumentu pa pista di dragrace si òf no. Anto si di bèrdat, tur e loke nan ku diputado James Kroon a hasi, pa e asuntu di pistanan i niun otro hende den gobièrnu òf otro organisashon ku tabata tuma parti na e drihuk, no por koregí ni e diputado di pasado, tampoko esun di awor pa haña klaridat, si asina ta polítiko, Dios spar kada un di nos riba e supuesto dushi isla di Boneiru.

Peliger riba kaminda

Ku e aktividat ilegal riba Kaya IR. Randolph Statuis van Eps ta peligroso no tin duda. Esnan ku ta praktik’é sa ku e ta peligroso pa ámbos partido. Pues ta spera un diputado yuda pa solushoná, yega na un manera kisas temporal, pa por práktika e deporte seif. Tin diferente manera ku por solushoná gran parti di e asuntu di ponementu di fever tambe pustamentu spesífikamente riba Kaya IR. Randolph Statuis van Eps. Si e deseo tei serka esnan konserní, huntu ku koredónan di outo i motosaikel, por krea un fasilidat temporal pa e deporte, te momentu bini klaridat riba e asuntu di pista na Onima. No ta rekerí niun sèn. Solamente boluntat.

Informashon ku a tende di hefe di INDEBON, esun ku ta atendé ku asuntu di pista pa fever na Onima a bisa: ”E pista na Onima ta liber pa tur hende por hasi uzo di dje. Aktualmente ta hasiendo trabou di mantenshon pa e ta stabil i duradero. Tin algun tempu kaba ta atendiendo algun rekisito, ku ta importante, pa loke ta trata organisá evento. Pa e motibu aki, por usa e pista pa trein sea ku outo motosaikel òf quad, te na momentu tur kos ta bon reglá, pa por organisá kompetensia na e pista na Onima.” 

Fuente: Fittpaldi/live99fm