ARTHUR SEALY KE SA KEN TA JOHN SOLIANO I KIKO TA SU SOÑO PA BONAIRE.

Kralendijk, – Gezaghèber John Soliano den su promé komunikashon dirigí na tur abitante di Bonaire a hiba ami na e preguntanan; Ken ta John Soliano i Kiko ta su soño pa Bonaire.

Por wak e diskurso for di diferente ángulo manera ekonomia, polítika, filosofia i sosiologia. Di mes e diskurso ta históriko, lesando e diskurso mi a reflehá riba e konsepto identidat. Den introdukshon di e diskurso por deliñá identidat di John. Ta un John Soliano tin ku ta nifiká un identidat individual. Den e parti sentral John ta usa palabranan manera esensial, antagonismo entre nos i nan, nos hendenan i patriotismo.

Mi konsepto di patriotismo ta; identidat nashonal ku sigur p’ami no ta nashonalismo. Komo persona nos ta úniko, pero nos personalidat komo un ser sosial ta produkto di pensamentu di otro. Den e diskurso ta bini dilanti e diskushonnan den John su sirkulo di amistat, influensia di lidernan ku e a topa i den su gradisimentu na famia i maestro Oleana.

Mi konklushon ta ku identidat tin dimenshon basá riba tantu un persona manera John su sekso, edat, profeshon i nashonalidat. Komo Bonaire komo isla ku su leinan, historia, tradishon i kultura. Den e diskurso John a opservá i presentá su mes pa spera riba señal ku ta bini di pueblo pa forma un opinion kon sigui presentá su mes.

FUENTE: ARTHUR SEALY /LIVE99FM