CIANA CJ ANTHONY, E REPRESENTANTE MAS CHIKÍ DI BONEIRU DEN BABY UNIVERSAL MODEL LOOK

Kralendijk, – Ciana CJ Anthony, yu di e rekonosído direktor di Bonaire International Art & Talent Academy, Sr. Johnrick Anthony, lo keda marká den historia komo e representante mas chikí ku Aruba, Boneiru i Kòrsou a konosé. Ku apenas 2 aña di edat, Ciana lo representá Boneiru den e sertamen Baby Universal Model Look, ku lo tuma lugá na Punta Cana, Republika Dominikana, for di 7 pa 11 di ougustus proksímo.

For di hopi chikí, Ciana a demostrá un interes profundo den e mundu di modelahe i a sigui di serka e preparashon di e kandidatanan di sertamenan di beyesa. E interes i dedikashon aki wordu rekonose pa su tata, Sr. Johnrick Anthony, kende ta un figura klave den e organisashon di sertamenan di beyesa na Boneiru. Rekonosé su potensial, su tata a disidí ku Ciana ta kla pa tuma e reto aki.

A pesar di su  edat, Ciana ya ta domina e posenan fotográfiko, pasarela i presentashonnan for di kabes, abilidatnan ku ta impreshonante pa un mucha chikí di su edat. E nivel di preparashon aki no solamente ta marká un hit den su karera tempran, pero tambe ta prométe tin un impakto signifikante den e historia di sertamenan di beyesa.

Ciana lo biaha ku e delegashon di Boneiru ku lo bai e sertamen di Hispanoamérica Internacional, akompañá pa su padrino, Sr. Gionel Virginie. E kombinashon di su talento , e guía di su tata i e sosten di su padrino ta sigura ku su partisipashon lo ta un evento histórko. E partisipashon di Ciana CJ Anthony den e sertamen Baby Universal Model Look no solamente ta un logro personal i familiar, pero tambe un orguyo pa henter e komunidat di Boneiru.

Su presensia den e esenario internashonal aki ta demostrá e potensial i kapasidat di e promesanan hoben di nos isla, i nos ta sigur ku Ciana lo laga un marka inolvidabel den e evento aki. Nos ta sperando ku ansha pa wak Ciana briya na Punta Cana i sigui su paso den e trayektoria emoshonante ku a kaba di kuminsá.

FUENTE: BIATA/LIVE99FM