Redakshon
Kralendijk, – Dia 5 di yüli último a selebrá e di 400 fiansa suministrá dor di Qredits Boneiru. E di 400 mikokrédito a keda ortogá na empresario Quensie Borgschot. Danki na e fiansa di Qredits, Quensie por bai fortalese su negoshi di transpòrt den e sektor di konstrukshon, yamá Riba Rand Transport. Qredits ta aktivo for di 2015 na Boneiru. Empresario nobo i eksistente por bini na remarke pa un mikrokrédito di un máksimo di $50.000,- òf $100.000,- pa finansiá e komienso òf ekspanshon di nan empresa.
Señor Roy Spit, Direktor Operashonal di Qredits, i e tim di Qredits Boneiru a entregá un chèk simbóliko na empresario Quensie Borgschot. Quensie ta un empresario lokal ku ya kaba ta ofresiendo servisio di entre otro transpòrt di material pa sektor di konstrukshon via di su kompania, Riba Rand Transport. Despues di analisá e desaroyo i (oportunidat di) kresementu di su kompania, Quensie a haña ta nesesario pa amplia e kantidat di trúk ku e tin pa asina por garantisá suministro di su servisionan. Pa esaki ela aserká Qredits pa finansiamentu i konseho riba algun aspekto di su negoshi i su plan pa futuro.
Qredits Boneiru tin komo meta sostené empresarionan pa start nan negoshi òf invertí den nan empresa eksistente. Esaki dor di ofresé entre otro mikrokrédito te ku un suma máksimo di $50.000 òf $100.000,-, coaching, training i medionan pa desaroyá na e empresario i su negoshi. Banda di e mikrokrédito ku semper Qredits Boneiru a ofresé, por apliká tambe pa e ‘Agrilening’ i e ‘BES-Cultuurlening’. E empresario ta paga un interes entre 1% i 9.95% durante e periodo di fiansa i por bini na remarke pa un periodo di grasia entre 4 i 12 luna. E porshento di interes i periodo di grasia apliká ta dependé di tipo mikrokrédito ku e aplikadó por bini na remarke p’é.
Qredits a habri su portanan den 2015 na Boneiru i su ofisina ta situá na Kaya Industria 15-G. E tipo di empresanan finansiá ta hopi variá i ta aktivo den diferente sektor. Tur tabatin mester di e empuhe finansiero nesesario pa realisá nan soño empresarial òf dal e siguiente stap ku nan empresa eksistente. Qredits ta haña importante pa e empresario tin ganashi den tur sentido di palabra. Pa e motibo ei Qredits – komo entidat finansiero sin metanan lukrativo – ta ofresé krédito, kurso, coaching i konseho na su klientenan. Paso emprendementu ta kuminsá na Qredits i nos ta mas ku djis fiansa!
Pa mas informashon tokante di Qredits Boneiru i nos produktonan finansiero, produktonan edukativo, nos programa di coaching i mas, por bishitá https://bonaire-po.qredits.com/. E wèpsait aki ta disponibel na dos idioma: Hulandes i Papiamentu. Por tuma kontakto ku nos tambe via 717-1412 òf via bonaire@qredits.nl. Bo tin bo plan di negoshi i plan finansiero kla? Petishon pa un krédito por keda hasí na un manera fasil i simpel via di e wèpsait.
GIPHY App Key not set. Please check settings