PÈRDIDA FORSA DI KOMPRA MAYORIA HABITANTE HULANDA KARIBENSE NA 2022

Kralendijk, – Forsa di kompra na Hulanda Karibense a baha na aña 2022 debí na inflashon haltu. Kompará ku aña 2021, pa e poblashon na Boneiru el a bai atras ku 4,2 porshento, na Sint Eustatius 3,3 porshento, i na Saba 1,6 porshento. Pa hende ku ta risibí un benefisio sosial na Boneiru i Sint Eustatius e forsa di kompra a subi sí, debí na subida di benefisio sosial i un supsidio adishonal pa energia. CBS ta informá esaki a base di sifra nobo.

Pa mehorá siguridat di eksistensia na Hulanda Karibense, for di aña 2019 ta tumando pasonan pa subi e suèldonan mínimo i e benefisionan sosial, i di e forma ei mehorá e forsa di kompra. Na 2022, fuera di e indeksashon anual a base di e inflashon na aña 2021, tabatin un subida èkstra di e benefisionan sosial i e suèldo mínimo. Tambe a bolbe subi kompensashon pa yu, i kasnan di famia ku ònderstant a haña un supsidio adishonal pa energia. Tòg, e medidanan aki no tabata sufisiente kompará ku subida di e nivel di preis promedio na 2022. Inflashon na Boneiru tabata 9,7 porshento, na Sint Eustatius 7,7 porshento, i na Saba 8,6 porshento. Dor di esei, na aña 2022 e forsa di kompra promedio a baha na tur tres isla, despues di 10 aña di subidanan práktikamente konstante.

𝑴𝒆𝒉𝒐𝒓𝒂𝒔𝒉𝒐𝒏 𝒅𝒊 𝒇𝒐𝒓𝒔𝒂 𝒅𝒊 𝒌𝒐𝒎𝒑𝒓𝒂 𝒑𝒂 𝒉𝒆𝒏𝒅𝒆 𝒌𝒖 𝒕𝒂 𝒓𝒊𝒔𝒊𝒃í 𝒃𝒆𝒏𝒆𝒇𝒊𝒔𝒊𝒐 𝒔𝒐𝒔𝒊𝒂𝒍

Kasnan di famia ku ònderstant na 2022 a risibí un supsidio adishonal pa energia pa por paga e kuenta di energia ku a subi. Ademas a subi e benefisionan sosial. Esaki a pone ku na Boneiru i Sint Eustatius e forsa di kompra promedio di hende ku tabata risibí un benefisio sosial a mehorá. Nan a bai dilanti ku respektivamente 2,2 porshento i 2,5 porshento. Forsa di kompra promedio di persona den kas di famia ku prinsipalmente entrada for di trabou a baha na tur tres isla. Na Boneiru, e pèrdida di forsa di kompra di hende ku trabou tabata mas haltu, 4,9 porshento. Pa hende ku trabou na Sint Eustatius i Saba, e forsa di kompra a baha ku 4,1 procent i 1,7 porshento.

Ora e forsa di kompra promedio baha, esei no ta nifiká ku tur hende ta bai atras. Asina, e forsa di kompra na aña 2022 a drecha pa por lo ménos 40 porshento di habitante di e islanan. Mas ku 90 porshento di e hulandesnan karibense ta parti di un kas di famia ku un entrada prinsipalmente for di trabou. Apesar di e bahada di forsa di kompra promedio, esaki a mehorá pa mas òf menos 2 di kada 5 persona. Di otro banda pa hende ku tabata risibí un benefisio sosial, ménos ku 10 porshento di e poblashon, un oumento di forsa di kompra no ta nifiká ku nan situashon a mehorá. Mas persona den e grupo aki a mira nan forsa di kompra subi kompará ku hende ku trabou. Na Sint Eustatius, situashon a mehorá pa 3 for di kada 4 persona den kasnan di famia ku prinsipalmente entrada for di benefisio sosial.

𝑵𝒂 𝑺𝒂𝒃𝒂 𝒑𝒂𝒓𝒆𝒉𝒂𝒏𝒂𝒏 𝒌𝒖 𝒚𝒖 𝒕𝒂 𝒃𝒆𝒏𝒆𝒇𝒊𝒔𝒊á

Na 2022, forsa di kompra di pareha ku yu na Saba a bai dilanti ku 0,5 porshento. Di tur sobrá kas di famia, e forsa di kompra a baha na tur tres isla. Na Boneiru i Sint Eustatius, e forsa di kompra a baha ménos serka soltero i famia ku un mayor. Pareha sin yu na Boneiru a bai mas tantu atras den poder di kompra. Nan a bai atras ku 5,8 porshento.

𝑶𝒖𝒎𝒆𝒏𝒕𝒐 𝒅𝒊 𝒇𝒐𝒓𝒔𝒂 𝒅𝒊 𝒌𝒐𝒎𝒑𝒓𝒂 𝒔𝒆𝒓𝒌𝒂 𝒆𝒏𝒕𝒓𝒂𝒅𝒂𝒏𝒂𝒏 𝒂𝒃𝒐𝒖 𝒏𝒂 𝑺𝒊𝒏𝒕 𝑬𝒖𝒔𝒕𝒂𝒕𝒊𝒖𝒔

Na Sint Eustatius, forsa di kompra pa personanan den kasnan di famia ku un entrada abou a drecha ku 0,4 porshento. E motibu pa esaki ta subida di benefisio sosial i e supsidio adishonal di energia risibí. Na Boneiru i Saba, e forsa di kompra promedio di e grupo aki a baha, pero ménos fuertemente ku serka e grupo di entradanan mas haltu. Na tur tres isla, persona den kas di famia ku un entrada haltu a mas bai atras. Tòg, e forsa di kompra a mehorá pa mas o ménos 1 for di kada 3 persona den e kasnan di famia aki.

𝑪𝒉𝒊𝒌í 𝒊 𝒈𝒓𝒂𝒏𝒅𝒊 𝒕𝒂 𝒃𝒂𝒊 𝒂𝒕𝒓𝒂𝒔

Personanan den kasnan di famia den tur kategoria di edat a bai atras pa loke ta forsa di kompra na aña 2022. Hende entre 40 i 60 aña di edat na Boneiru mester a entregá mas na forsa di kompra, esta 4,8 porshento. Na Saba, hende riba 60 aña a bai mas atras, esta 2,5 porshento.

Definishon:

𝑴𝒆𝒉𝒐𝒓á 𝒔𝒊𝒈𝒖𝒓𝒊𝒅𝒂𝒕 𝒅𝒊 𝒆𝒌𝒔𝒊𝒔𝒕𝒆𝒏𝒔𝒊𝒂

Na 2022, gabinete a subi e suèldo mínimo legal i e benefisionan sosial di AOV, AWW i ònderstant na Hulanda Karibense ku 10 porshento. Esaki a enserá un subida total di 10 porshento, konsistiendo di un korekshon pa inflashon, komplementá ku un subida komo parti di maneho pa kada isla. Pa Boneiru, Sint Eustatius i Saba, e inflashon (den e di 3 kuartal di 2021) tabata respektivamente 4,3, 2,4, i 3,2 porshento. Riba esei a bini un subida komo parti di maneho di 5,7 porshento pa Boneiru. Pa Sint Eustatius i Saba, e subida komo parti di maneho tabata respektivamente 7,6 i 6,8 porshento riba e inflashon.

Entrante aña 2022, a hasi kompensashon pa yu igual na tur tres isla, esta 89 dòler pa yu pa luna. Entrante promé di yüli 2022, a bolbe subi esaki pa un suma di 99 dòler pa yu pa luna.

Ademas, a base di analogia ku un areglo na Hulanda Oropeo, e gabinete a prosesá un supsidio adishonal pa energia di un biaha so pa akomodá kasnan di famia ku un entrada abou na Hulanda Karibense. Pa Hulanda Karibense ta konta ku tur kas di famia ku un entrada te 130 porshento di e mínimo sosial por risibí un supsidio di 1300 dòler. Kas di famia ku mester biba ku solamente un pago di ònderstant ta risibí e supsidio adishonal pa energia ofisialmente. E sobrá kasnan di famia mester pidi e supsidio adishonal pa energia i no ta risibí esaki promé ku aña 2023.

𝑫𝒆𝒔𝒂𝒓𝒐𝒚𝒐 𝒅𝒊 𝒇𝒐𝒓𝒔𝒂 𝒅𝒊 𝒌𝒐𝒎𝒑𝒓𝒂

A kalkulá desaroyo di forsa di kompra di un persona komo e kambio porsentual di un aña pa otro di e entrada ku un kas di famia standarisá tin disponibel pa gasta, koregí pa e kambio di preis. Lo klasifiká e kambionan porsentual aki di abou bai ariba, i e balor meimei – tambe yamá e balor promedio òf e balor na sentro (mediaan) – e ora ei ta ekspresá e kambio di forsa di kompra di e (sup)poblashon en kuestion. E forsa di kompra (dinámiko) por kambia debí na tur tipo di kousa.

E entrada ta kambia por ehèmpel dor di un subida di suèldo, un promoshon, aseptá un (otro) trabou, i penshun. Kambionan den komposishon di kas di famia (un yu ta sali for di kas, partnernan ta bai for di otro) tambe ta hiba na un kambio di entrada. Den desaroyo di forsa di kompra dinámiko a inkluí tur e kambionan aki den e kalkulashon.

Lo kalkulá e forsa di kompra pa 2022 relashoná ku e mesun grupo di persona na 2021.

𝑮𝒓𝒖𝒑𝒐𝒏𝒂𝒏 𝒅𝒊 𝒆𝒏𝒕𝒓𝒂𝒅𝒂

Pa kada persona a kalkulá e entrada promedio standardisá ku e kas di famia tin disponibel pa gasta pa aña 2021 i 2022. Repartishon den e kuater gruponan di entrada di abou bai ariba (inkomenskwartielgroepen) ta basá riba e promedionan aki pa aña 2021 i 2022. Asina ta koregí regreshon pa e promedio.

Determinashon di e gruponan di entrada a tuma lugá pa kada isla apart.