Redakshon
Kralendijk, – Mi a ripará ku mi sorpresa a oumentá ora mi a lesa un artíkulo den Boneriano, i ku riba e promé página den letra grandi ta bisa ku un miembro di konseho insular ta haña protekshon 24 ora i 7 dia pa siman. Den e página interior di Boneriano por saka afó ku ta trata di e konsehal Cyrill Vrolijk ku, pa motibonan ku te awe no ta konosí, ocho luna pasá a hòrta asiento bai kune i asina efektívamente a manda e kolegio di MPB i UPB kas. Ta defini hòrtamentu di asiento komo un kambio den e distribushon di asiento den un representashon di pueblo dor ku un polítiko ta kambia bai un otro frakshon òf ta sigui den forma di un frakshon independiente.
E artíkulo ta bisa cu Sr. Vrolijk tin miedo di represaya y miedu ku un persona lo hasi’é daño físiko. Esaki a bolbe surgi siman pasá ora un polítiko di MPB a ranka sali verbalmente pisá kontra Sr. Vrolijk. Vrolijk na su turno a kore bai ministerio públiko pa hasi denunsia i e ta di opinion ku e lidernan polítiko di UPB i MPB ta agitando e pueblo kontra dje. Violensha verbal kontra polítiko na Boneiru no ta nobo. Tin biaha e situashon por bira hopi pió ora e emoshonnan ta bira fuerte i tin alkohòl den e wega. Den e kaso di Vrolijk por bisa ku loke ela pasa aden ta un wega di mucha kompará ku tempunan pasá. Ounke siguridat ta importante, polítikonan mester ta kapas pa soportá algu.
Sinembargo, e situashon aktual ta lanta preguntanan. Kon serio e menásanan ta ku e mester ta vigilá 24/7? E kaso di ladronisia di asiento a tuma lugá ocho luna pasá, pues si un hende tabatin mal intenshon, nan lo no a warda asina hopi pa klarfiká un ke otro serka Sr. Vrolijk. Aparentemente e ta usando medionan di frakshon pa paga pa e vigilansha lokual no ta normal i según e reglanan ínterno esaki no ta posibel tampoko. Otro kos lo ta si Ministerio Públiko den koperashon ku e kuerpo polisial Caribe Hulandes konstatá ku e menasa ta real. E ora ei e ta haña vigilansia i protekshon pero e fondonan finansiero mester sali for di e presupuesto di pais Hulanda òf di e entidat públiko.
Sinembargo, sr. Vrolijk ta lubidá loke a sosodé ku Sr. Rafael Santana na 2014. Segun e parlamentario di e tempu ei ku ta van Raak, un empresario di Kòrsou a pone un arma di kandela na kabes di Santana. E empresario tabata ke pa Santana basha e kolegio di Boneiru abou. Segun Van Raak, Santana a ser ofresé $120.000 den kontante i si e nenga, e lo ser matá. Santana no a aseptá e sèn, pero sí a hasi denunsia na Ministerio Públiko (mira: https://tpo.nl/column/un-tentativo-di-un-coup-sur-bonaire/).
Na e momentu ei mi tabata grifir di konseho insular di Boneiru i mi mester a tuma medida pa protehá Sr. Santana.
Entre otro, e tabatin eskolta di polis na reunionnan públiko y eskolta pa i for di su kas, i su kas y su vesindario tabata keda vigilá extra.Loke a pasa ku Santana ta den fuerte kontraste ku loke a pasa ku Vrolijk, i ta parse ku awor e ke asumí e ròl di víktima. Mas probabel ta ku e pueblo no ta satisfecho ku e funshonamentu di e kolegio aktual i esaki awor ta bira mas i mas evidente. Ta mas ku lógiko ku nan kier enfrentá su persona pa ku esaki. Polítikonan en general, i Sr. Vrolijk en partikular, mester ta kapás pa soportá krítika fuerte, komentario severo i tin bia hasta insulto, sin ku esaki ta afektá nan funshonamentu òf estado di ánimo negativamente. Sinembargo, ta parse ku Sr. Vrolijk no ta kapás pa hasi esaki i no ta honesto sufisientemente pa splika e pueblo di Boneiru dikon ocho luna pasá ela tumba e kolegio.
FUENTE:DR. WILLEM A. CECILIA\LIVE99FM
GIPHY App Key not set. Please check settings