Redakshon
Willemstad – Riba 30 di yanüari 2026, Konseho di Minister (di Reino) a bai di akuerdo ku e nombramentu di prof. dr. Paul Hilbers komo miembro nobo di e tres Kolegionan, riba proposishon di Hulanda.
Señor Hilbers ta susesor di señor Hans Hoogervorst. Anteriormente, riba 31 di òktober 2025, Konseho di Minister (di Reino) a nombra drs. Hans Hoogervorst komo Presidente di e tres Kolegio di supervishon finansiero (Cft), komo susesor di Lidewijde Ongering, kende a okupá e funshon di Presidente pa tres aña. Tantu Paul Hilbers komo Hans Hoogervorst ta kuminsá den nan funshon nobo entrante promé di febrüari 2026.
Despues di a studia matemátika na Rijksuniversiteit Utrecht i ekonometria i ekonomia internashonal na Vrije Universiteit Amsterdam, Paul Hilbers a desaroyá un karera den sektor finansiero. Den e periodo ei, e tabata asosiá pa hopi tempu na Nederlandsche Bank, entre otro komo Direktor di Supervishon di Polítika i Direktor di Stabilidat Finansiero.
Banda di esaki, Hilbers a desempeñá vários funshon serka Fondo Monetario Internashonal (IMF) na Washington, mas resientemente komo miembro di e Hunta Ehekutivo, un posishon ku el a okupá te na final di 2024.
E ta profesor emérito na Nyenrode Business Universiteit i e ta outor di numeroso publikashon nashonal i internashonal tokante di maneho makroekonómiko, finansa gubernamental, supervishon riba e sektor finansiero i relashonnan ekonómiko internashonal.
Presidente saliente Lidewijde Ongering ta deseá tantu Hans Hoogervorst komo Paul Hilbers hopi éksito den nan funshon nobo.
FUENTE: CFT/LIVE99FM
GIPHY App Key not set. Please check settings