KAMPAÑA: ‘HUNGA KU PASHON, NO KU AGRESHON!’.

Kralendijk – Ku e afan pa pone mas atenshon riba e kresementu di violensia den futbòl lokal, nos di Federashon Futbòl Boneriano a lansa un kampaña ku e lema:

‘Hunga ku pashon, no ku agreshon!’

Meta di e kampaña aki ta pa konsientisá henter e pueblo boneriano, spesialmente tur ku ta envolví den e mundu di futbòl, riba e importansia pa mantené rèspèt, disiplina i deportivismo den tur nivel di futbòl tantu pa hende hòmber komo hende muhé, for di chikí te na grandi.

Ku e kampaña aki nos ke logra pa stòp ku violensia tantu verbal komo físiko riba i rondó di tereno.

Futbòl ta nos deporte stimá i nos no por sigui tolerá agreshon di niun forma. E kampaña ta yamá, pa tur hende praktiká e deporte ku pashon, amor, rèspèt pa otro i ku saber di bo responsabilidat komo un bon siudadano den nos komunidat.

Durante nos siguiente partidonan lo tin diferente hende ku t-shirt di stòp ku violensha bistí i tambe presensia mas visibel di outoridat rondó di tereno pa reforsá e mensahe ku nos ke trese dilanti esta;  ‘Hunga ku pashon, no ku agreshon!’

Nos ta invitá tur hungadó, dirigente, rèfri, fanátiko i tur hende pa yuda krea un kultura deportivo, positivo i ‘safe’ riba Boneiru.

Huntu nos por logr’é!

#HungaKuPashon #NoKuAgreshon #FFB

FUENTE: FEDERASHON FUTBÒL BONERIANO/LIVE99FM