POSIBEL BAHADA FUERTE DEN TURISMO NA BONEIRU: MESTER AKTUA KU URGENSIA!

Kralendijk,- Jolinda Craane, lider polítiko di UPB, tin gran preokupashon tokante e futuro di turismo na Boneiru. “Un bahada serio den turismo ta un peliger real i nos mester aktua awor,” Craane ta bisa. Segun e, den e último añanan a invertí simplemente muchu tiki den turismo.

E Kolegio Ehekutivo anterior a skohe pa buska konfrontashon ku e sektor privá turístiko, en bes di kolaborá. Un di e konsekuenshanan di esaki tabata e stopmentu di e buelonan di JetBlue pa Boneiru.

Tambe den e área di turismo di krusero, segun Craane, ta invertí muchu tiki. “Di esaki tambe nos lo mira e konsekuenshanan negativo,” e ta avertí.

P’esei Craane ta boga pa un reunion  urgente entre gobièrnu i e sektor privá turístiko. “Te ainda, turismo ta e úniko aktividat ekonómiko grandi aki na Boneiru,” e lider di UPB a bisa. “Konsekuenshanan negativo di e falta di invershon aki nos lo bai sinti pronto i promé ku nos por drecha i transformá turismo den kresementu kualitativo, lo bai pasa sigur dos aña. P’sei mester kuminsá mesora” Craane ta konkluí.

“Turismo ta e galiña ku ta pone webu di oro.”

FUENTE: JOLINDA CRAANE (LIDER DI UPB)