20 AÑA DEDIKÁ NA DESAROYO DI KOMUNIKASHON I LIDERASGO EFEKTIVO NA BONEIRU.

Kralendijk,- Flamingo Toastmasters Club a selebrá su di 20 aniversario, markando dos dékada dediká na desaroyo di komunikadó nan kompetente i lidernan inspirativo na Boneiru.

Fundá na 2006, Flamingo Toastmasters Club ta parti di Toastmasters International, un organisashon edukativo ‘non-profit’ ku aproksimadamente 270.000 miembro den mas ku 14.000 klup na 150 pais.

Pa binti aña, e klup a proveé un ambiente di sosten kaminda individuonan ta fortalesé abilidatnan di komunikashon, haña mas konfiansa propio i desaroyá abilidatnan di liderasgo.

Durante e último dos dékadanan, 83 miembro a forma parti di e eksistensia di e klup. Den 15 di su 20 añanan, Flamingo Toastmasters Club a haña rekonosementu di klup distiguí ‘Distinguished Club’.

E klup a pasa den transishon di e Programa di Edukashon ‘Legacy’ pa e ‘Pathways Learning Experience’ moderno, a amplia oportunidatnan a traves di reunionnan virtual ku klupnan rònt mundu, i a kolaborá ku otro klup pa organisá e Konferensha di Caribbean Toastmasters 2019 na Boneiru.

E selebrashon di aniversario pues a trese miembronan aktual i anterior, famia, amigunan i invitadonan distinguí huntu pa selebrá e logro bunita aki.

Presidente aktual di e klup, Sra. Noritza Rosalia a reflekshoná riba e añanan di e klup i su futuro, rekòrdando tur hende ku “e mihó añanan ta nos dilanti.”

Miembro fundador i Toastmaster Distinguí Sherwin Pourier tambe a reflehá riba dos dékada di kresementu, bisando, “Nos a yega hopi leu, i mi ta sigui ku mi kompromiso pa kontribuí, pasobra mi ke pa otronan eksperensiá loke Toastmasters a duna mi.”

Durante e selebrashon, rekonosimentu speshal a keda duná na e kuater miembronan fundadó ku a mantené nan miembresía durante henter e historia di binti aña di e klup: Toastmasternan Sherwin Pourier, Paulina Rodriguez, Marugia Janga i Silvia Martis.

E anochi a konkluí den ambiente ameno ku músika bibu. Awor ku Flamingo Toastmasters Club ta kuminsá su di tres dékada, e ta keda komprometé na empoderá individuonan pa bira komunikadonan sigur di nan mes, lidernan kapas, i influensianan positivo den e komunidat Boneriano.

Pasobra e logro di mas grandi di e klup no por keda midí pa medio di premio, distinshon òf logronan. Su berdadero impakto ta reflehá den e hendenan ku a hiba e konfiansa i abilidatnan di liderasgo ku nan a desaroyá pa medio di Toastmasters den nan lugánan di trabou, negoshinan, organisashonnan di boluntario, gobièrnu, i e komunidat di Boneiru.

FUENTE: FLAMINGO TOASTMASTERS CLUB/LIVE99FM