Redakshon
Kralendijk- Korte den Promé Instansia a deklará Anthony Wilson i Rudolfo van Henningen kulpabel di asesinato di Sheldon Johnson. A kondená Wilson na 28 aña di prizòn, miéntras Van Henningen a risibí un kastigu di 21 aña. Esaki segun demanda di Ministerio Públiko. E hòmbernan aki a skucha nan sentensia sin demostrá niun klase di emoshon.
Por a nota un atmósfera emoshonal den sala di korte. Ora Hues a lesa e sentensia, famia i sernan kerí di Sheldon Johnson ku a sigui palabranan di Hues ku tenshon, no por a wanta nan lágrima. Na Saba i Sint Maarten, hopi famia i amigu a sigui e sentensia via video.
Segun fuentenan di BONERIANO na Saba, e momento tabata hopi emoshonal. Despues ku e sentensia a bira konosí, famia i amistatnan di e víktima a yora, brasa otro i a ekspresá alivio. Nos fuente ta bisa ku hopi hende ta sinti ku finalmente hustisia a prevalesé. Apesar ku e sentensia no por trese Sheldon Johnson bèk, e desishon di Korte a duna e famia un sentimentu di pas despues di un periodo largu di doló i insertidumbre.
Kobardemente
For di promé dia, tantu Wilson komo Van Henningen a nenga nan envolvimentu den e asesinato. Wilson a deklará ku e tabata pafó i ku el a mira un “shadow man” kore, miéntras su defensa a insistí ku no tin prueba ku e tabata e tiradó. Korte, sinembargo, a yega na un otro konklushon. Pa hasi esaki Korte a formulá i kontestá 4 pregunta. E “shadow man” tabata e tiradó? Wilson ta e ‘shadow man’?Kua tabata e papel di Rudolfo van Henningen? Tabatin sufisiente prueba pa konkluí ku tabata un asesinato premeditá?
Segun Hues, e imágennan di kámara di seguridat, huntu ku e prueba forénsiko, no ta laga espasio pa duda. Segun Korte, no tin un otro splikashon razonabel ku Wilson tabata e tiradó.
Tokante Rudolfo van Henningen, Korte a konkluí ku su papel tabata mas grandi ku simplemente yuda despues di e akto. Segun Hues, e dos hòmbernan a aktua huntu, a vigilá e víktima i a koordiná nan akshonnan. P’esei a deklará Van Henningen ko-outor di e asesinato.
Wilson a haña tambe kastigu pa intento di asesinato di Carti, e pareha di Jonhson. Banda di esaki el a risibí kastigu pa poseshon di kokaina. Den su motivashon, Hues a bisa ku a tira Sheldon Johnson kobardemente, tras di lomba. I despues a purba tapa loke a sosedé. Hues a pone énfasis riba e sufrimentu inmenso ku e asesinato a kousa na famia, pareha, amigunan i komunidat Sabano.
Daño i perhuisio
Korte no a deklará atmisibel e petishonnan di daño emoshonal di famia. Esaki pasobra den Karibe Hulandes ainda no tin un lei ku ta permití kompensashon di e tipo di daño den un proseso penal. Si famia ke sigui ku e petishon, nan lo mester hasi esaki den un prosedura sivil.
Carti sí a risibí un kompensashon di 5.000 dòler. A deklará e resto di su petishon inatmisibel, ku e posibilidat pa sigui e demanda den Korte Sivil.
E kondenádonan tin 14 dia pa apelá e desishon di Korte den Promé Instansia.
FUENTE: BONERIANO
GIPHY App Key not set. Please check settings