KÒRSOU ACU TA ASELERÁ SU TRANSFORMASHON DIGITAL PA DUNA SOSIONAN MAS FASILIDAT, SEGURIDAT I AKSESIBILIDAT

Willemstad,- Algemene Spaar- en Kredietcoöperatie ACU a tuma un paso importante den su trayekto di transformashon digital ku e implementashon di un proseso moderno di inkorporashon digital (digital onboarding), desaroyá den kolaborashon ku AXIOMA i Shufti Pro. E inisiativa akí ta permití pa personanan inisiá un relashon ku ACU di un manera mas rápido, mas sigur i mas kumbiniente, sin pèrdè e balornan kooperativo ku ta forma e fundeshi di e organisashon.

E implementashon akí ta un ehèmpel konkreto di kon ACU ta pone su vishon na práktika i ta kontribuí na su kuater pilarnan stratégiko: Konfiansa, Forsa di Komunidat, Sostenibilidat i Inovashon.

“Na ACU nos ta kere ku inovashon tin balor solamente ora e mehorá bida di hende. E implementashon akí ta un paso importante den nos strategia pa konstruí un kooperativa mas aksesibel, mas efisiente i mas mihó prepará pa futuro, manteniendo semper nos sosionan i nos komunidat den sentro di tur loke nos ta hasi,” segun Eldrid Fos, Direktor General di ACU.

Ku e proseso nobo, personanan por kuminsá nan afiliashon na ACU for di kas, trabou òf kualke otro lugá, usando un telefòn inteligente, tablet òf kòmpiuter. E plataforma ta usa teknologia avansá pa verifikashon di identidat i proseso di kumplimentu, i ta garantisá seguridat, protekshon di dato personal i efisiensia.

E transformashon digital di ACU ta forma parti di un strategia mas amplio pa mehorá e eksperensia di sosio, oumentá efisiensia operashonal i desaroyá servisionan ku ta respondé na e nesesidatnan di un komunidat moderno.

“Na ACU nos ta mira teknologia komo un medio pa sirbi hende mihó, no komo un meta final riba su mes. Nos ta invertí den inovashon pa hasi nos servisionan mas aksesibel, mas efisiente i mas sigur, sin pèrdè e kontakto humano i e balornan kooperativo ku ta karakterisá nos

organisashon,” asina Dennial Daal, Direktor Finansiero di ACU ta indiká.

Pa e sosionan nobo, e proseso ta nifiká mas fasilidat, ménos tempu di espera, mas seguridat i akseso mas rápido na produkto i servisionan di ACU.

FUENTE: ACU KORSOU/LIVE99FM