SINDIKALISMO TA I MESTER TA PREOKUPÁ I MESTER SALI FUERTE DILANTI I BOSIFERÁ NAN PREOKUPASHON PA KU E KLASE TRAHADÓ I SU FAMIA

Kralendijk,- Al fin al kabo ta esei ta e meta ku sindikalismo ta sirbi den kualkier komunidat. E siman ku a kaba mi a risibi un app di un komersiante ku a hala mi atenshon riba un desaroyo di preis di kontainer ku ta trese karga Boneiru ku lo bai afektá preisnan den un forma hopi serio.

Huntu ku e loke ela manda ela bisami i mi ta sita: “Boneiru prepará pa subida di preis pa produktonan for di Merka”. Nos a tira un bista i e siguiente preisnan lo drenta na vigor entrante 12 di aprel próksimo. Nan ta pa e diferente grandura di konteinernan i konteiner ku karga friu for di Merka.

20′ CT/FR/OT	$200.00	$700.00
40′ CT/FR/OT	$400.00	$1,400.00
45′ CT	$462.00	$1,587.00
20′ RE	$320.00	$1,120.00
	Aktual	Entrante 12 di aprel

Nos lo mester mira ainda kuantu e preis lo bira for di otro paisnan den regio, for di Kòrsou  i for di Oropa. Mirando e krisis mundial ku ta konsekuensia di e guera entre Israel i Merka kontra Iran tur indikashon ta ku ta pió so e krisis lo bira.

Si siman pasá nos a hala atenshon riba desaroyo di preisnan aki na Boneiru den tur aria, e informashonnan aki tin ku pone nos tur riba un alerta i speshalmente nos gobièrnu, tantu aki na Boneiru komo na Den Haag, pero tambe nos representantenan aki na Boneiru den Konseho Insular i na Ulanda den Tweede kamer.

Pa mi keda aki na Boneiru, mi ta di opinion ku mester yama un reunion di urgensia di Dialogo Sentral pa atendé e punto aki. Na e mesa di diálogo aki mester analisá kua ta e medidanan legal ku tantu gobernashon lokal komo nashonal por tuma, kon ta intensifiká kampaña di informashon pa hasi e konsumidó konsiente, ki kòntròl i supervishon gobièrnu ta bai ehersé i kua medidanan dirigí ta tuma pa krea un ambiente honesto i stabil den kua ta hasi e konsumidó ménos vulnerabel pa desaroyonan di preis pa loko.

Ekonomia ta un tarea ku ta den nos man. Nos, esta Konseho Insular i Bestuurscollege tin e asina yamá prijzenwet na nos disposishon den kua den tempu di krisis gobièrnu por drenta i aktua komo reguladó. No regulá pa kibra merkado, sino regulá pa protehá e konsumidó en general i en partikular e konsumidó vulnerabel.

I esnan vulnerabel den nos komunidat ta den mayoria, nan ta e kobradónan  di ònderstant, e kobradónan di penshun di behes pa kende esaki ta nan úniko entrada, e trahadónan ku ta kobra sueldo mínimo i e trahadónan ku ainda ta riba e trapi salarial mas abou den e kompania.

E prijzenwet ta regla ku si merkado ta ofresiendo preis pa servisio i produkonan pa tal preis ku e ta kontra of menasá di ta kontra interes general, Bestuurscollege por tuma sierto medidanan. Banda di e lei aki tin mas lei ku ta protehá e konsumidó ku ta na disposishon di gobièrnu i ku gobièrnu por duna instrukshon pa su direktorado di Mantenshon i Supervishon sali dirigí ku kòntròl riba nan.

Atrobe lei di universo ta manda e señal kla pakiko e Union Sindikal ta di gran importansia pa ta e vigilante di desaroyonan sosial ekonómiko ku por perhudiká netamente nan miembronan i nan famia. Mi ta spera sinsero ku internamente miembronan tambe ta kuminsá move.

E situashon ta serio i bo tin tres opshon, sinta ketu i man krusá i laga kos bai numa, sinta na banda i laga otro lucha pabo i spera ku bo ta kosechá òf bo tambe duna un man i ban lucha huntu pa un sosiedat mas husto i honesto.

Abo mes skohe den kua grupo bo ta òf bo ke ta.

FUENTE: NORWIN NÒCHI WILLEM/LIVE99FM