E PENÚLTIMO KOLUMNA SINDIKAL PA AÑA 2025 LO TA DEDIKÁ NA TUR SHÒPTEWARDNAN DI E SINDIKATONAN AKI NA BONEIRU.

Kralendijk,– Ta bon pa realisá ku e wesu di lomba di kualkier sindikato ta su shòpstewardnan. Direktiva ta e kabes, miembronan ta e kurpa pa karga e kabes pero esun ku ta tene e kurpa stret ta e wes’i lomba di e kurpa, esta e shòpstewardnan.

Shopstewardnan ta e aspekto mas importante pues di kualkier sindikato. Nan ta forma e brùg ente e trahadó i gerensia den e kompania i/o e instituto i/o e fundashon na unda e sindikato tin representashon. Nan ta responsabel pa e komunikashon diario entre e gerensia i e trahadónan i nan tin un papel  vital pa segurá ku ta respetá i protehá e derechonan di e trahadó.

For di punto di bista di e trahadónan, e shòpstewardnan mester ta nan representante, nan bos i nan abogado. Ta nan ta skucha e kehonan, ta nan ta negoshá pa nan i ta lucha pa nan derechonan.For di e punto di bista di gerensia e shòpstewardnan mester ta e mediadónan na trabou, nan ta esnan ku ta resolvé problemanan i ta sigurá ku e trahadó ta kumpli ku su obligashonnan esta ta produsí i ta kontentu. Nan ta yuda krea un ambiente di trabou di harmonia ku ta benefisiá tantu e trahadó komo e kompania.

Pa e siguiente motibunan e importansia di shòpstewardnan den un sindikato.ta evidente.

Nan ta perkurá pa komunikashon direkto entre trahadó i gerensia. Esaki ta nifiká ku nan por atendé rápidamente i efisientemente ku kualkier problema o tema sin mester bira rònt largu. Nan mester tin konosementu di lei- i reglanan laboral di moda ku nan por dil bon ku temanan legal  ku por presentá. Esaki ta yuda protehá e trahadó su derechonan i ta segurá ku ta trata e trahadó korekto i husto. Nan ta negoshadó, kual ta nifiká ku nan por boga pa mihó kondishonnan di trabou, salario i otro benefisionan pa e trahadónan. Esaki ta hopi importante sigur den kompanianan kaminda e trahadó ta mal pagá i ta vulnerabel. Nan por duna sosten i konseho na e trahadó ora esaki tin problema na trabou. E problema por varia  di algu chikí ku un kolega te na algu serio di abuso i/o komportashon ku ta surpasá limite manera intimidashon seksual, tentamentu, peso di trabou di mas ku por kousa burnout ets. Dunando e sosten i konseho nan ta yuda krea un ambiente di trabou sigur i saludabel. Nan ta responsabel pa sigurá ku trahadonan ta konsiente di nan derecho- i debernan. Esaki ta inkluí aspektonan di salú i seguridat, oranan di trabou, pago di salario. Edukando i formando e trahadónan shòpstewardnan ta yuda krea un forsa laboral mas konsiente i ta empoderá e trahadó.

Ku e konosementu aki, mi ta hasi un yamada na USIBO en partikular pero tambe na tur sindikato ku ta operá na Boneiru pa den 2026 duna speshal atenshon na e posishon di boso shòpsteward. Na un banda mester bin kursonan di formashon, pero na otro banda mester perkurá den relashon ku e dunadó di trabou pa rekonosé i respetá e ròl di e shopsteward(nan) riba flur di trabou i den un forma organisá i strukturá nan mester haña un funshon ofishal di konsulta regular ku gerensia i tim di gerensia. Esaki mester ta e desaroyo ku USIBO ta sigui boga pe, esta di hiba funshonamentu di sindikalismo riba e siguiente nivel, un funshonamentu mas profeshonal. I pa loke ta kursonan di formashon, mester bin un fondo den kual gobièrnu, organisashon di dunadónan di trabou i sindikalismo ta kontribuí a base di un yabi di repartishon ku ta tene kuenta ku e forsa finansiero di kada un. E benefisio di e desaroyo aki lo ta hopi positivo pa tur envolví.

P’esei awe mi ta yama un danki na tur e shòpstewardnan ku ta duna nan aporte i sosten tantu na nan sindikato komo na e empresa i na tur e trahadónan. E sirkumstansianan manera deskribí ainda no ta riba e nivel ku ta deseá, pero apesar di esei a duna tur loke nan tin pa e bon kousa i krea un ambiente harmonioso riba flur di trabou. Di mi parti nan ta risibí tur rèspèt i rekonosimentu i di kurason mi ta spera ku nan koleganan na trabou tambe ta duna nan e rèspèt i rekonosimentu aki. I ku nan por risibi tur sosten i aporte di sindikato, di gerensia i di nan koleganan pa nan por ehersé nan tarea mas optimalmente posibel.

FUENTE: NORWIN WILLEM