AKLARASHON DI JACINTO “CHINTO” CARLO.

Kralendijk,- Último tempu ora mi saka mi komunikado pa prensa mi ta haña vários reakshon, tin ta positivo i tin ku ta negativo. Mi ta satisfecho ku e tantísimo reakshon positivo i di enkurashá, danki pa tur e reakshon.

Lokual ku si mi ke aklará,  ku tin den algun di e reakshon ku ta bisa kos pa kibra mi,  pa mi no sigui skibi. Ta ami mes ta skucha tur reunion di konseho Insular i mi ta paga tinu riba kada un di e konsehal nan kon nan ta komportá nan mes den konseho insular. Mi ta skibi puntonan ku mi ta kere ku mester haña atenshon di mi parti i ta skibi un komunikado riba e puntonan. Mi a pone atenshon kaba riba kuater konsehal tantu di koalishon komo di oposishon, tambe riba gezaghebber.

Lokual ku mi ke logra ku mi komunikadonan ta pa yuda mehorá e nivel di konseho insular. Trese krítika konstruktivo i riba nivel pa dilanti.

Ta lokual nos konsehal nan ta proyektá, ta e refleho di nos komunidat. Ta p’esei si un konsehal profilá positivo trese punto alkaso i konstruktivo dilanti esaki ta hisa e nivel di konseho insular. Tambe esaki ta yuda eduká nos komunidat kon pa komuniká i kon pa papia, anda ku otro.

Mi lo no stòp di trese mi puntonan dilanti, si mi nota algu ,ku mester trese esaki dilanti, na bienestar di nos komunidat mi lo hasi esaki. Mi lo no keda na konseho insular so.

Lo mi sigui vigilá tur hende ku ta profilá sea na radio, televishon, sindikato, òf personanan ku ta buska publisidat i ku ke ta populista  lo mi reakshoná riba nan i pruba na trese e otro banda, pa nos komunidat por husga pa nan mes. Mi lo purba na yuda eduká na e banda konstruktivo i alkaso asina nos komunidat por bai dilanti i konosé e diferensia entre lokual e persona ta trese dilanti. (segun mi alkanse i mi humilde kapasidat)

Mi ta boga pa, NO mal informá i pone nos komunidat riba mal kaminda, manera último lunanan ku a transkurí ku a pone pakiko mi a kuminsá na skibi. Tabata venená nos komunidat, papia malu di otro,  ku tono agresivo, destruktivo i ataka persona i no e echo ku mester a akudí na dje.

Tur esaki tabata reflekta den nos hubentut, hóben adultonan, komportashon den deporte , ku  hasta mester a bin pone kámara i pidi pa mas vigilansia di polis.

Nos ta un pueblo humilde respetuoso, un pa otro.

No lubidá ku mas hende a bin biba na Boneiru. Kada unu ku nan karakter i kultura. Esnan ku ta profilá na radio televishon i konseho insular mester sigui bringa pa nos por mantené nos humildat, ku rèspèt pa otro, tambe kuida nos kultura, ku ta hende desente i orgulioso di ta boneriano.

Mi no ta duna entrevista na radio ni televishon por lo pronto, tampoko buska popularidat. Mi ke sigui konsentrá riba mi skibimentu, skucha reunion di konseho insular, tambe skucha esnan ku si ta duna entrevista i buska popularidat pa wak si nan ta trese nan punto ophetivo pero kritiko dilanti. Si e sei no ta e kaso nan por konta ku mi lo reakshoná i pone e banda ophetivo,konstruktivo dilanti pa e komunidat por husga pa su mes.

Jacinto “Chinto” Carlo lo sigui skibi e lo no stòp, esnan ku ke kibra mi inisiativa pa skibi wèl lubidá paso lo mi sigui trese mi komunikado di prensa dilanti. Tin hopi petishon pa mi publiká mi komunikadonan riba facebook,  por bisa ku pronto lo mi kuminsá hasi esaki tambe.

Por lo pronto Chinto Carlo lo tei ku su komunikadonan.

FUENTE: JACINTO CARLO.