ANUNSIO IMPORTANTE PA IMIGRANTENAN TOKANTEE DI SEIS PÈRMIT

Fundashon Union di Imigrantenan Boneriano (FUIB) ta informá ku ofisina di imigrashon IND a bai di akuerdo pa kambia nan maneho tokante e asuntu di e di 6 pèrmit pa por haña e pèrmit permanente.

Dia 3 di sèptèmber 2025 nos a risibí un e-mail di e hefe di IND, Sr. Rusco Lamidi, ku Hulanda a bai di akuerdo pa apliká lei na un manera ménos severo y ku IND lo no eksigí mas ku imigrantenan mester pidi y risibí un di 6 pèrmit di estadia pa un aña, promé ku nan por pidi un pèrmit di estadia permanente.

Awor no ta momento pa kontroversia.

FUIB a kritiká IND fuertemente y públikamente entre otro tokante e tópiko aki. Pero ora meresé elogio nos ta duna esei tambe. FUIB ta hopi kontentu ku e desishon di IND aki y ta ekspresá su apresio ku IND a tuma e desishon aki. No solamente esei.

Nos mester informá públiko tambe ku den kuminsamentu di e aña aki ta IND (hefe interino Sra. Ginette Albersen) a tuma e inisiativa pa invitá FUIB pa kombersá over di imigrashon en general y, si FUIB kier a papia over di un tópiko espesífiko, ku nan lo ta habrí pa esei tambe. Anto asina e tópiko en kestion a keda entamá y solushoná awor.

FUIB y tur imigrantenan tin hopi apresio pa esaki. E kaminda ta keda largu, pero tin un inisio awor. Naturalmente, lo no ta ku semper lo tin éksito. Pero ora IND of gobièrnu en general ta demostrá ku nan ta habrí pa diálogo y ta aktuá tambe a base di razonabilidat, nos tur mester tin apresio pa esei. E ta un ekspreshon di demokrasia sano.

E desishon di IND ta enserá tambe ku esnan ku a pidi y a paga pa un di seis pèrmit durante e periodo entrante 1 di yüli 2022 te ku awor, lo haña nan sèn bèk. Kada persona individual mester entregá un petishon por eskrito na IND pa por risibí su sèn bèk.

Kualkier imigrante ku ta deseá di haña mas informashon presiso over di esaki of otro problema hurídiko por tuma kontakto ku Direktiva di FUIB (yama: 787 2373) of por pasa libremente na nos Konsultorio hurídiko grátis tur djasabra di 4’or te 6’or di atardi na Ofisina di Abog. Bijkerk na Antriol. Adrès: Kaya Jose G. Hernandez 16A. Telefòn y whatsapp: 796 2650.

FUENTE: FUIB ABOG. M. BIJKERK