SELEBRANDO DIA INTERNASHONAL DI PUEBLO AFRIKANO I NAN DESENDIENTENAN

 Kralendijk,- 31 di ougùstùs, nos ta selebrá Dia Internashonal di Pueblo Afrikano i nan desendientenan—un dia pa honra e espíritu, herensia, i forsa di resistensia di e pueblo Afrikano i su desendientenan ront mundu.

Ami, James Finies, ta para aki komo un yiu di Áfrika i di Karibe Indígino. Mi raíznan ta konta un historia di sobrevivensia di siglonan di opreshon: antepasadonan di mi welonan ta hòmber Afrikano orguyoso ku a wordu ranka for di su tera I origin Áfrika; mi wela i su antepasadonan tabata hendenan Indígino Karibense ku a wordu horta for di Boneiru hiba Hispaniola pa e kolonisadónan Spañó. Banda di mi tata, mi famia a karga e peso di meskla di sanger Oropeo, desendiente Afrikano i sobrevivientenan Indígino — tur ku mesun destino i sufrimentu bou di brutalidat di gobernashon kolonial.

Nos antepasadonan Afrikano a wordu sekuestra, trese Boneiru, i forsa pa traha den salinjanan di salu, kaminda hopi a pèrdé nan bista i nan bida tabata di durashon kortiku den e “fiernu blanku”, ku e salinjanan tabata wordu yama. E berdat aki a wordu skondi pa nos; na skol nan no a siña nos di nos mes heruenan, o historia di nos isla, sino di riwnan Hulandés, konkistanan Hulandés, i asesinonan di nos antepasadonan komo heroe.

Hasta awe, mientras hopi pais Karibense ta selebrá Emansipashon, nos na Boneiru a keda bou di dominio kolonial I ta sigui nenga nos hustisia i nos derecho di autodeterminashon. Nos leynan ahinda ta wordu disidi  I traha na Den Haag — e mesun suidad ku tin e Korte Internashonal di Hustisia i ta pretende di defendé derechonan humano. Gran hipokresia.

Ser un desendiente Afrikano ta personifiká sobrevivensia, forsa, i dignidat firme ku no por a wordu kibra. Pero tambe pa sigui ku e lucha — pa rekonosementu, pa hustisia, i pa libertat real. Riba e dia aki, nos ta honra e memoria di nos antepasadonan pa sigui karga nan lucha i pa sigurá ku nan sufrimentu no tabata pornada.

Nos ta selebrá no solamente ken nos ta, pero pa sigui ku e lucha pa derechonan humano di libertat i hustisia — ku nos ta determina pa garantisa pa e generashonnan ku ta bin.

 Bonaire Human Rights Organization – Pueblo Progresivo I Uni -Muhernan Fuerte Bonaire – Movimento Pa Kambio

FUENTE: BONAIRE HUMAN RIGHTS ORGANIZATION