Redakshon
Kralendijk,- E forma indiferente ku ta atendé e aña aki ku Dia di Boneiru ta indiká ku e konsenshi di e nifikashon tras di e dia aki ku na 1986 a keda stipulá komo un dia nashonal no t’ei òf na mi pareser no ta duna e dia e balor ku e meresé.
E fasilidat ku te ainda a motivá pa kambia e dia riba kua tin un protokòl ofishal di konmemorashon di selebrashon di 6 di sèptèmber mester keda desaprobá pa henter komunidat.
Kiko ta sosodé dia 6 di sèptèmber. E ta primeramente e fecha ku nos ta rekordá ku Alonso de Ojeda a pone pia riba e suela di Boneiru i ku desde e fecha ei na 1499 e habitantenan di e isla a krea un historia i a forma un komunidat di un pueblo ku un herensia kultural úniko.
Pa reflehá e unidat i outensidat di e pueblo aki tin diferente símbolo ku a i por usa, entre otro nos tradishonnan kulinario, tradishonnan di bistimentu, di balia, di selebrá fiesta pero tambe di entiero i kompartí tristesa, nos matanan(flora) i nos animalnan(fauna), pero tambe símbolonan manera nos bandera, nos himno i nos eskudo. I mas ku tur kos e vehíkulo ku ta mara nos komo un nashon, un pueblo, nos idioma maternal ku ta Papiamentu.
Un dia di Boneiru ta kreá netamente pa nos para ketu i reflehá ken nos ta kiko nos ta, kiko nos por i kiku nos tin na potensha pa sigui konstruí riba e fundeshi ku nos a heredá. Diskursonan ku kontenido di diferente gremio ta ilustrá e importansia di para ketu na e Dia di Boneiru. Un di e bunita akshonnan ku a keda entrodusí ta e rekonosementu di e siudadano di honor pa sirbi komo ehèmpel di e boneriano ku ta duna inkondishonal na su isla i su próhimo e AMOR di konbibí, di karga ku otro di saka un man i yuda, di no laga ningun ruman keda atras.
Tur esakinan konbiná tin ku lanta den nos alma i kurason e sentido di patriotismo, di orguyo i outoestima di ta un boneriano.
Ora hisa e bandera dia 6 kompañá ku e glorioso letranan profundo di e himno, unda ku bo ta, esta sea komo partisipante na e aktonan seremonial, na kas, den kunuku, den hòspital, den prisòn, den kas di kuido o den estranheria, bo tin ku para ketu i reflehá.
Tera di Solo i Suave bientu, e promé frase di nos himno ku ta tipifiká e uniko i outéntiko di nos medio-ambiente i naturalesa. Unda a sali ku awe na 2025 ku e solo a bira nos enemigu i ku e ta un estorbo pa nos por partisipá i disfrutá di esun dia nashonal aki den e 365 dianan ku un aña tin. Diripiente nos a bira di manteka?
Unda nos rèspèt propio, unda nos rekonosimentu di nos orguyo nashonal, a keda. Un liderasgo ku ta anda ku asina indiferensha ku nos dia nashonal meresé di ta liderá?
Na unda e liderasgo lo ta ora ku nos eksistensia ta bou di menasa, e lo entregá o kore skonde i no enfrentá ku balentia i defendé nos patrimonionan nashonal. Kon nos ta kere di lanta i forma un generashon nobo ku lo karga ku orguyo nos identidat i e símbolonan ku esaki ta representá. Ta na e forma ku nos ta trata i balorá nos mes, otronan lo trata i balorá nos.
Ta e forsa i kayente di e solo di nos a forma nos antepasadonan ku for di ora solo a Sali mainta te ora solo a drenta atardi a laborá bou di sirkumstansia i kondishonnan pésimo pa konstruí loke awe nos ta disfrutá. Ta den e higra di e solo ei nan a kana distansianan largu pa bai traha o pa bai hasi nan diligensianan.
Ta ku e solo ei nos a seka e karni di kabritu i e piská pa nos por a i broma ku orguyo ku nos yòrki i nos piská salu komo kuminda típiko boneriano. Ta e solo ei ta atraé bishitantenan for di lugánan leu pa bin bronsea nan koló di kuero i krea pa nos un ekonomia ku ta brinda trabou na nos hendenan.
Ta e solo ei a sirbi pa nos ta orguyoso awe di nos flora. Ta e mesun solo ei ta e remedi natural esta vitamina D ku a hasi nos hendenan resistente den tempu di Covid i otro malesanan.
Nò fui, si akaso mes nos bira asina delikado pa e solo di 9’or di mainta te 12’or di mèrdia e opshon mas akseptabel lo tabata kuminsá e aktividatnan protokolar 5’or di atardi pero riba 6 di sèptèmber ku ta DIA DI BONEIRU. Simplemente e eskoho pa selebrá e seremonianan protokolar dia 5 no ta bon i no ta akseptabel. Nos tin tur tempu pa korigí e eror grave aki, tur tempu pa re-evaluá e desishon robes aki i tur tempu pa duna rèspèt, rekonosimentu i honor na 6 di sèptèmber ku nos a denominá komo komunidat komo DIA DI BONEIRU i fiesta nashonal.
Nos ta den un lucha tenas pa mantené nos idioma, pa konservá nos herensia kultural ku ta bou di preshon enorme, por fabor no kometé e eror ku nos mes ta menospresiá tambe loke Dia di Boneiru ta i tin ku nifiká pa nos.
FUENTE: NORWIN NÒCHI WILLEM UN SIUDADANO BONERIANO
GIPHY App Key not set. Please check settings