BARBADOS: PAIS HÓBEN, LASONAN FUERTE: CHÈFNAN DI POLIS TA FIRMA AKUERDO DI KOOPERASHON

Bridgetown,- Paisnan Karibense tin hopi kos en komun: un historia kompartí, un kultura fuerte i un sentimentu profundo di unidat.

Nan ta kompartí desafio tambe: violensia ku arma di kandela persistente, vulnerabilidat pa atakenan sibernétiko i menasa di krímen organisá transnashonal. Hustamente esaki ta pone ku kooperashon regional ta vital.

Siman pasá e kooperashon akí a keda reforsá visibelmente: e chèf di polis di Kuerpo Polisial di Sint Maarten, komishonario Carl John, e chèf di polis di Kuerpo Polisial di Kòrsou, komishonario Raymond Ellis, i e chèf di polis di Kuerpo Polisial di Hulanda Karibense, komishonario Alwyn Braaf – den koordinashon ku nan minister responsabel – , a firma ku Lt. Col. Michael Jones, Executive Director di CARICOM IMPACS, un letter of intent ku ta fortalesé e lasonan.

Jones a enfatisá basta tempu kaba e nesesidat pa kooperashon regional i anteriormente el a deklará: “No por papia sufisientemente di e impakto devastador di arma di kandela ilegal den Karibe.

Ta solamente huntu nos por baha e menasa aki i konstruí sosiedatnan mas sigur pa nos hendenan.”

E kooperashon no ta keda solamente riba papel.

Den yüni un entrenamentu forénsiko di sinku dia a tuma lugá na Sint Maarten den kooperashon ku Trinidad and Tobago Forensic Science Centre. Den sèptèmber lo tin un entrenamentu nobo, e biaha aki riba krímen organisá i arma di kandela.

Tambe den e área di krímen sibernétiko tin pasonan ku ta ser tumá. E Cybercrime Fusion Center na Barbados ta yuda paisnan pa fortalesé nan resilensia digital. Ademas, e kooperashon akí lo kontribuí na un manera signifikante na e lucha kontra violensia ku arma di kandela, kontrabanda di hende i benta di hende den region.

Un punto prinsipal den e akuerdonan ta e importansia di kompartimentu di informashon. No ta importá si ta trata ekspertisio forénsiko, menasa digital òf krímen transfronteriso: ora paisnan ta kompartí datonan, señalnan i análisenan, nan ta oumenta nan forsa kolektivo.

Di e forma aki paisnan lo kompartí nan watchlists entre nan mes i via CARICOM, ku ta hasi mas difísil pa kriminalnan move libremente den e region. Esensial den e proseso akí ta e feedback, di moda ku e siguiente pais tambe por antisipá na tempu posibel entrada di kriminalnan.

Durante nan bishita na Barbados e chèfnan di polis a sera konosí ku e fasilidatnan di CARICOM IMPACS. Nan a kompartí eksperensia tokante nan mes kuerpo i tambe nan a papia tokante e kooperashon ku nan tin kaba den e Kolegio di Chèfnan di Polis. E kooperashon ya eksistente ta forma un base firme pa sigui konstruí riba dje.

E papel di lidernan polisial for di e parti Karibense di Reino ta birando kada bes mas visibel. E chèf di polis di Sint Maarten a keda eligi resientemente komo promé vicepresidente di Association of Caribbean Commissioners of Police (ACCP), un rekonosementu pa e kontribushon di paisnan di Reino den e struktura di seguridat regional.

Paisnan Karibense ta relativamente hóben, pero e kooperashon entre nan ta desaroyando den un ritmo lihé. E letter of intent ta enfatisá e konvikshon kompartí ku solamente pa medio di esfuerso kolektivo, akuerdonan práktiko i kompartimentu intensivo di informashon, e region por bira mas resistente kontra violensia, menasa sibernétiko i krímen organisá. For di siman pasá, un kontribushon konkreto a keda duná pa logra un Karibe mas sigur.

FUENTE:KOLEGIO DI HEFENAN DI POLIS/LIVE99FM