NOS TA EDUKÁ PA DEN NOS KOMPORTASHON HASI E DISTINKSHON ENTRE NORMAL I NO­­-NORMAL, ENTRE BON I MALU.

Kralendjk,- Mi a mira i skucha e entrevistanan ku miembronan di koalishon i e debate den Konseho Insular i tambe komportashon di tur ku tabata outorisá pa tabata presente den sala di reunion.

Por a mira i tende kiko a tuma lugá durante suspenshon di e reunion. Despues di mi pensamentu i emoshon mi mente a bai riba Immanuel Kant (1724-1804) ku a bisa; nos mente no ta laga nos mira loke realmente a sosodé pero solamente kon e suseso a presentá nos dilanti.

Ami ta biba den komunidat boneriano i ta politikamente aktivo i no ta husga ningun hende. Nos tur ta responsabel pa nos aktitut i mester komprendé reakshonnan riba nos pensamentu i emoshon. Mi ta pidi kada unu ku tabata den sala di reunion pa tuma kurashi i hasi e pregunta; ki ta e motibu di su aktitut durante e reunion i tambe na tur ku a mira i skucha kiko a tuma lugá sin buska kousa serka un otro

Mi ta konsiente ku ta difísil pa mira e relashon entre kousa i konsekuensia, kon un hende mester aktua a base di un lei universal i kon yega na e kapasidat pa husga.

Mi a mira un parti ku mi no tabata konosé di e konsehalnan. Nos tur  tin talento i ta piká pa dispidí nos talento. No skondé bou di piedra pero apliká loke nos himno ta bisa sea humilde i no keda na intenshon pero aktua pa trese kambio. Lo bo topa traba, menasa, rechaso pa eliminá bo.

Bo arma mester ta bo ambishon moral. Kompas moral no ta pèrmití pa tira falta, rabia, zundra, deseá otro malu, ofendé otro, hasi  chèrchi ni den chansa. Odio, vengansa i banidat (ijdelheid) no ta den kategoria di birtut. Kurashi, honestidat, amabilidat, sabiduria i dominio di bo mes ta kai den kategoria di birtut. Lesa e buki (De meeste mensen deugen) Mayoria di hende ta sirbi, di historiadó Rutger Bregman.

FUENTE: ARTHUR SEALY /LIVE99FM