MOSHON DI DESKONFINSIA KONTRA CLARK ABRAHAM PARKTIKAMENTE AKSEPTA

Kralendijk, – Ayera den Konseho Insular oposishon a presenta un moshon di deskonfiansa kontra di aktual Diputado Abraham. E moshon ta mustra riba e frakaso total di señor Clark Abraham komo diputado. Tambe e moshon ta hasi menshon di e forma deskabea i sin direkshon ku Diputado Clark Abraham a maneha Kolegio Ehekutivo te ku awor. E moshon ta sigui hasi menshon di e echo ku Kolegio Ehekutivo a laga dos diputado hende muhe bai, siendo ku e diputadonan si tabata funkshona. Pa loke ta trata e kartera di finansas e moshon ta hasi menshon di e desaster ku Diputado Clark Abraham a hasi den maneho finasiero. Finalmente e moshon ta menshona tambe e echo ku tur kos ta pega i no ta kana den maneho di gobierno pa motibu di Diputado Clark Abraham.

Ora ku a bai votashon pa e moshon, naturalmente ku teknikamente e 5 miembronan di Koalishon a vota kontra. Pero praktikamente si, “e moshon di deskonfiansa a pasa”. Esaki mester ta un señal kla pa señor Clark Abraham. Pasobra si Frakshon M21 i Frakshon Vrolijk a aksepta ku mester kambia e konstelashon di Kolegio Ehekutivo, esaki ta nifika ku praktikamente nan tur dos ta na fabor di e moshon di deskonfiansa kontra Diputado Clark Abraham. Mas aleu ainda, tur kos ta indika ku lo kita e karteranan aktual for di Diputado Clark Abraham, otro señal kla ku e moshon di deskonfiansa praktikamente a keda aksepta unanimamente.

No tin ningun otro splikashon posibel. E sinku miembronan di Koalishon por sigui hunga komedia, pero e realidat ta ku nan tur sinku a aksepta ku Diputado Clark Abraham a hasi un desaster den Kolegio Ehekutivo i mester a bini kambio. Solamente nan no tin e kurashi di pidi señor Clark Abraham pa sali kompletamente for di Kolegio Ehekutivo. For di momentu ku un Koalishon a aksepta ku mester kambia e konstelashon di Kolegio Ehekutivo, nan ta praktikamente na fabor di un moshon di deskonfiansa kontra di Diputado Clark Abraham. Pueblo lo sinta mira den e dianan aki kon nan lo kita karteranan for di Diputado Clark Abraham, pues un biaha mas señal ku Koalishon tambe a pasa Diputado Clark Abraham un moshon di deskonfiansa.

FUNETE: FRAKSHON DI UPB/LIVE99FM