KOMISHON DI SANTANA DI RINCON TA HASI YAMADA NA TUR HENDE KU TIN KÈLDER DEN SANTANA DI RINCON, PA KUMINSÁ TUMA NAN RESPONSABILIDAT PA HASI LIMPI RÒNT DI E KÈLDER.

Kralendijk,- Na hopi okashon momentu tin entiero, ta bini remarke nan ku Santana ta sushi, pero e tristu ta ku hopi ta esnan ku tin defuntu den Santana i no ta kòrda riba nan, sino te na momentu di Todo Defuntu, ku ta na komienso di novèmber pa hasi un limpiesa rònt di nan kèlder i fèrf esaki. 

Mirando ku últimamente e yobidanan ku tabatin a trese kuné, despues ku komishon a hasi un limpiesa, Santana a bolbe yena ku hopi yerba i matanan grandi i hopi di nan, a asta tapa kèlder nan di famia.

Komishon a disidí di bolbe hasi un limpiesa general i hopi tabata rònt di kèlder di hopi hende mirando ku ainda nos no ta mustra e atenshon i rèspèt na nos defuntunan den Santana.

Ta bai un supliká na tur doño di kèlder pa hasi esfuerso i bai tira un bista rondó di bo kèlder.

Aworakí komishon ta hasiendo atrobe un limpiesa grandi, pero komishon di Santana no ta esun responsabel pa limpia rondó di kèlder di famia, manera nos a trese dilanti diferente biaha, esei famia ta responsabel.

Ta un bèrgwensa pa mira kon tin famia ta dera nan ser kerí i no ta bira wak patras mas, pa e kèlder di nan ser kerí.

Tin di nan ku asta e krans nan di for di entiero a bira bieu i deskuidá i a keda den e mesun posishon ku a pone nan i bai laga nan atras i esaki tambe ta kousa sushedat den santana i pa ku nan kèlder.

Si akaso bo mes no por hasi rondó di e kèlder limpi, por tuma kontakto ku komishon ku por trese bo den kontakto ku un persona, ku ta hasi e trabou di limpiesa den Santana, pa hasi e trabou di limpiesa rondó di kèlder pa famia.

Tene na kuenta ku niun hende ku tin un graf den Santana Rincon NO ta pagando un kontribushon pa por hasi nan kèlder limpi, pa nan i mayoria biaha ta komishon ta hasi e gastu nan aki, pa nan kèlder. Esaki tambe ta bai kambia pronto i ku tur hende tin ku kuminsá paga un kontribushon pa luna/aña pa graf.

Un biaha mas Komishon di Santana ta bolbe rekordá tur famia ku nan ta responsabel pa tene rondó di nan kèlder limpi.

Ta pidi na kada persona ku hasi nan kèlder limpi, pa depositá esaki na un manera responsabel den e kònteiner ku tin parti sùit den Santana i no tira nan abou, kaminda den Santana òf bai ku un saku di sushi depositá bo sushi aden i pone parti sùit den Santana.

TENE NA KUENTA!

Kòrda ku Santana ta un lugá kaminda ku nos tur un dia mester bai aden, p’esei laga nos yuda kontribuí i duna rèspèt na nos ser kerí ku ta sosegá den nos Santana i pa tene Santana limpi, tantu pa nos mes, komo pa nos sernan kerí ku ta sosegá den dje.

Si nos kada un kolaborá i tene nos kèlder i 50 cm rondó di dje limpi, santana ta keda hopi  limpi. Potrètnan ta duna un bista kon tabata i kon a keda despues di limpiesa.

Atentamente,

Komishon di Santana Rincon.

FUENTE:FITTIPALDI PIETERSZ/LIVE99FM