KORSOU: WARDAKOSTA DI KARIBE HULANDES, KUERPO POLISIAL DI KÒRSOU  I OTRO OUTORIDATNAN KOMPETENTE LO HASI KONTROLNAN RIBA LAMAN I NA NOS KOSTA DURANTE DI FUIKDAG 2026. 

Willemstad,- Meta di e kontrolnan ta pa tur hende mantené nan mes na e medidanan ku Gobièrnu di Kòrsou a stipulá pa e dia aki, i pa huntu nos mantené òrdu públiko.  

Wardakosta ta informá doñonan di botonan di plaser, boto nan komersial i Jet Ski, tokante e siguiente reglanan pa Fuikdag 2026.

E reglanan prinsipal ta:

• No ta permití benta di ningun tipo di produkto riba e dia aki. Esaki ta inkluí entre otro; kuminda, alkohòl i otro tipo di produkto nan.
• No ta duna pèrmit pa muzik públiko riba vlòt òf podio.
• Tur boto mester tin dokumentonan di nabegashon bálido huntu ku nan (vaarvergunning, vaarbewijs, keuringskaart i registratie kaart). 
• Mester tin sufisiente vèst di salbabida konforme e kantidat di persona permití riba boto
• Personanan riba Jet Ski tambe mester bisti un salbabida. 
• Mester tin artefaktonan apropiá di señal i flùit na bordo.
• No ta permití tokamentu di muzik despues di 5 or di atardi. Lo tin kontrol na bahianan pa evitá aglomerashon di boto i hende.
• Boto nan di afó por pidi un pèrmit di anker ku ta bálido pa ankra nan boto te ku 5 or di atardi riba e dia ei (4 yanüari 2026).
• No ta permití hiba òf trese hende (Water Taxi); únikamente personanan ku nan propio boto por drenta bahia di Fuik. Esaki pa prevení ku personanan keda pega na bahia di Fuik. Esaki lo por krea un problema na momento ku nan ta purba di kana bai bek via di tereno priva di Santa Barbara. 
• Tur boto ku ta bin for di otro pais i bin bishitá Kòrsou, ta obligá di pasa Imigrashon i Duana pa ‘klaar in’. Tambe ta posibel pa hasi e trámite aki na e ofisina ‘One Window’ di Imigrashon i Duana, situá banda di e restorant Boca 19.
• Tur persona ku ta usa ‘Slipway’ mester mustra nan komprobante di pago.
• Pa lei, no ta permití nabegá bou di influensia; tene esaki na kuenta.

Otro puntonan di importansia :

• Lo tin èkstra kontrol riba Jet Ski. Esaki relashoná ku seguridat i komportashon riba laman.
• Komportashon iresponsabel den Bahia di Fuik no lo ser tolerá.
• Hende riba Jet Ski mester pone èkstra atenshon ora drenta bahia di Fuik, mirando ku lo tin un kantidat grandi di hende i mucha landando durante di e dia aki.
• Tene kuenta ku no ta posibel pa baha boto of Jet Ski na Kura di Buriku. E lokalidat aki no ta disponibel pa públiko.
• Servisio di Bombero tambe lo ta presente pa kontrolá e proseso di BBQ riba boto kana manera mester ta. 
• Haven en Veiligheid Inspectie (HVI) huntu ku Wardakosta lo kontrolá riba tur e rekisitonan menshoná.
• Den kaso di emergensia bel 913.

Wardakosta, Kuerpo Polisial i tur otro outoridatnan kompetente i enkargá ku mantenshon di òrdu públiko lo atendé debidamente kontra tur esnan ku no tene nan mes na e medidanan menshoná.

Outoridatnan ku lo ta presente pa kontrolá durante Fuikdag i duna asistensia riba e dia akí ta; Wardakosta, Kuerpo Polisial, Haven en Veiligheid Inspectie (HVI), Brantwer, GMN, Santa Barbara Security, Rode Kruis, Fundashon Kuido Ambulance Kòrsou i Citro.

FUENTE: WARDAKOSTA/LIVE99FM

NEDERLANDS: