KONSEHALNAN NA LUTO

Kralendijk,- Konsehalnan bistí na pretu a bisa di ta na luto, pero ken a fayesé no ta konosí. Si ta argumentá ku a bini kambio den Wolbes i Finbes sin konsultá ku Konseho Insular ta nifiká ku ta na luto pa konseho Insular mes.

Laga mi hasi algun pregunta. Dikon no a bisti na luto dia konsehal Vrolijk a mata Kolegio Ehekutivo. E dia ei a balia gosa I mira posibilidat pa bai dikta. Dikon ta keda tira falta riba e Kolegio Ehekutivo asesiná pa konsehal Vrolijk.

Ta sadista mes bo ta pa aktuá asina. Dikon no a bisti na luto dia Representante di Reino a tuma koroto debí na mal maneho tokante Lèntfil. Pasobra no ta maneho di Abraham i su muchanan, uzando palabra di Ramomcito Booi, pero ta falta di MPB/UPB.

Dikon no a bisti na luto dia a asesiná un vakgedeputeerde pasobra mester a buta un diputado pa M21. Dikon no a bisti na luto dia a nenga splika den konseho Insular dikon no tabata di akuerdo ku diputado Cicilia. Dikon no a bisti na luto, si ta sa ku oposishon ta bai kousa problema dia 14 di ougùstùs pa skohe diputadonan nobo. Dikon konsehal Makaai no tin e kurashi di pidi despensa públikamente i bisa “Mi a aktua robes dia 14 di ougùstùs”

Dikon koalishon no ta bisti na luto pa motibu ku ta solamente 5 konsehal ta sostené e 3 diputadonan i ku ta sigur ku no tin konfiansa den diputado Abraham ku ta den un silensio profundo komo ku a kita su kosnan di hunga. Dikon no a bisti na luto dia sinku di sèptèmber pa motibu ku tabatin protesta pa no a tene reunion solèm seis di sèptèmber den sala di konseho Insular.

Miembronan di Koalishon boso konfiansa den boso mes, ta lanta deskonfiansa pa motibu ku boso no ta duna espasio pa pensamentu otro. Boso batimentu riba pechu i tiramentu di falta riba Hulanda, Representante di Reino, Ombudsman, Koninkrijksrelatie, MPB I UPB ta bira boso desgrasia. Lo ta bon si boso pone un streki hel na boso paña. .

FUENTE: ARTHUR SEALY