TREMENDO KONMEMORASHON, KUAL TA UN AKTO PA REFLEHÁ BÈK DI UNDA NOS A BIN, KEN NOS TA, KIKO NOS TIN, KIKO NOS POR.

Kralendijk,- E ta e momento pa evaluá nos presente pa determiná i fiha na unda nos kier bai. Ta esei ta e kontenido profundo di NOS TA BONEIRU,

 den kua e palabra nos ta simbolisá e union, e interkonekshon entre nos tur den e sosiedat, pero tambe e determinashon pa nos karga huntu e futuro briante ku Boneiru tin, usando ku tur nos kapasidat, eksperensha, konosementu i talentonan e oportunidatnan ku tin.

Ora e bandera ta bai haltu bou di tononan di nos himno e ta hala nos atenshon pa nos huramentá i deklará den nos alma i kurason lealtat na nos nashon. I mes tremendo tabata e selebrashon di Dia di Boneiru inkluyendo tur e aktividatnan ku a kulminá dia 6 di sèptèmber. Laga ta nos propósito pa nunka mas duda ni tòrnu na e dia aki. I laga e dia aki keda komo e vürtoren, e kòmpas ku ta guia nos kada bes pa rekordá na unda nos tin ku yega. Pues un pabien na e komishon organisadó i na henter komunidat.

Huntu nos a logré.

Sindikalismo, representá den Diálogo Sentral pa USIBO i organisashon di dunadónan di trabou, representá pa Busines Federation Bonaire djaweps 4 di sèptèmber a firma un akuerdo di esfuerso pa den negosashonnan pa CAO-nan i otro aktividatnan sindikal trata na yega na distinguí rekompensa entre trahadónan ku kualifikashon i esnan sin kualifikashon i pa logra fondonan pa krea posibilidatnan pa e trahadó por desaroyá su mes na nivelnan mas haltu i ku den esaki e dunadónan di trabou ta hiba e mesun maneho, esta di hasi distinkshon entre trahadó ku i esun sin kualifikashon i di stimulá nan trahadónan pa partisipá na kursonan i entrenamentunan pa alsa nan nivel i pone tambe medionan finansiero pa logra esaki hasiendo uso di fondonan di supsidio disponibel ku lo mester bin for di nos gobernashonnan tantu lokal komo for di Den Haag.

Nos ta realisá ku e akuerdo aki so no ta sufisiente pues nos ta hasi un apelashon riba otro partnernan den nos komunidat pa nan tambe dentro di nan aria tuma medidanan apropiá pa amplia posibilidatnan pa nos trahadónan hisa nan nivel di konosementu i abilidatnan i asina mehorá nan kalidat di bida. Pa USIBO a firma presidente Mavis Abrahams i pa Buisines Federation Bonaire a firma Eddy Carillo.

Ku esaki sindikalismo na Boneiru ta sigui progresá ku un filosofia moderno i ku ta kuadra ku desaroyonan den nos komunidat i riba nos merkado laboral. Sindikalismo na Boneiru pa basta tempu kaba ta manda e señalnan kla i raspá ku no ta kore tras di sèn so, pero ta pone mes tantu atenshon na sirkumstansianan laboral, pues e klima i ambiente den kua e trahadó ta ehersé su labor i tambe na desaroyo personal di e trahadó.

Bida ta un proseso di siñamentu kontinuo ku no tin fin. I ta e forma mas adekuá pa e trahadó por bai dilanti, progresá tantu den su posishon komo den su rekompensa, esta su salario i otro kondishonnan laboral. Ta e forma pa mas i mas nos duna kontenido na e tres r-nan, esta Rèspèt pa konosementu i abilidat di e trahadó, Rekonosé e trahadó pa ku su konosemento, abilidat i kompetenshanan pa finalmente Rekompensé den un forma hustu.

Ta bon pa menshoná ku siman pasá djaweps riba inisiativa di sindikalismo a tene un reunion entre gerensia di Selibon, Hunta di Komisario di Selibon, Akshonista di Selibon, esta Bonaire Holding Maatschappij representashon di Kolegio Ehekutivo di Boneiru, diputado Anthony Weber. Den e enkuentro aki sindikalismo a pone su posishon bon kla pa ku e importansia di kontinuidat di e kompania Selibon den un forma nobo, pero finansieramente i ekonómikamente saludabel.

Esaki pa garantisá seguridat di trabou pa 80 tata i mama di famia, pero tambe pa garantisá seguridat i salú riba flur di trabou ku ekipo i material adekuá pa e trahadó por hasi su trabou mas produktivo posibel, Tur esaki  na bienestar di medio-ambiente i naturalesa limpi, na bienestar di higiena i salú di tur nos habitantenan, pero tambe nos bishitantenan i na bienestar di nos produkto turistiko ku nos ta bende, esta un Boneiru limpi. Ta e forma pa duna aporte real i konkreto na e lema ban krese pero kuidando nos naturalesa i nos kultura i tambe e otro lema it’s in our nature, pues ta a asina nos ta, NOS TA BONEIRU.

FUENTE: NÒCHI WILLEM/LIVE99FM