Redakshon
Kralendijk,- Ounke e fecha ofishal proklamá pa Asamblea General di Nashonnan Uní ta 3 di mei. Meskos ku organisá bo mes den un sindikato ta un derecho fundamental ankrá den lei, Dia di Prensa ta referí na un otro derecho fundamental humano, kual ta libertat di ekspreshon.
Ta pa tal rason sindikalismo lo defendé ku tur su forsa i ku tur instrumento na su disposishon libertat di ekspreshon komo e pilar mas fuerte pa karga funshonamentu demokrátiko di nos komunidat.
Bos di Pueblo ta e partisipashon mas grandi komo fundeshi di nos demokrasia na Boneiru. E forma masal ku komunidat a reakshoná riba un desishon ku nos politikonan/gobernantenan a tuma ku un aire di arogansia i aserka kalifiká esnan ku a trese nan opinion i kritika dilanti komo un grupito hasidó di bochincha i bòmbòshi finalmente a pone ku mester a dobla pa e preshon di e komunidat.
Ku esaki a keda demonstrá ku e poder ta serka e pueblo i ku un komunidat konsiente ta kapas pa influenshá i kambia fundamentalmente e rumbo di un maneho robes.
Ni un koalishon ku ta pretendé di ta sólido i uni no por resistí un komunidat konsiente di su poder. Tantu gobièrnu komo e mayoria den Konseho Insular mester a realisá ku desishonnan purá for di tras di lèsenar sin konsultá debidamente i ku rèspèt pa pueblo lo topa resistensia i pèrdè nan legitimidat.
I tur esaki danki na e libertat fundamental di ekspreshon di kada individuo, di kada grupo i kargá pa un Prensa Liber aki na Boneiru. Pues e pabien ta solamente, unikamente i eksklusivamente dirigí na e komunidat i no na ningun Bestuurscollege.
Pueblo boneriano, realisá ku boso a sirbi komo ehèmpel den e siman ku a pasa pa otro komunidatnan. Demokrasia real ta muchu mas ku gana elekshon, forma koalishon di un mayoria polítiko a base di traishon, goberná ku manipulashon, ets.
E ta tambe partispashon aktivo di e siudadania sigur ora ta trata desishonnan ku ta mishi ku kurason di e komunidat, manera ta e kaso di Dia di Boneiru, kual ta konmemorá nos identidat komo pueblo i ku pa lei a keda dekretá komo un dia nashonal i hasta liber.
Awe sindikalismo ta felisitá tur ku ta laborá den Prensa rònt mundo pero spesialmente esnan aki den nos komunidat. Selebrá e prinsipionan fundamental di libertat di prensa, evaluá huntu e menasanan kontra e libertat aki i para firme kontra kualkier atentado ku ta mishi ku e independensia di un Prensa Liber. Laga pa esnan ku pueblo a sostené, konfia i apoyá pa representá nan, no mancha e órgano mas haltu di nos demokrasia kual ta Konseho Insular ku arogansia di poder i laga demokrasia real funshoná ku partispashon aktivo di e komunidat den toma di desishon. Al fin al kabo ta nan interes boso ta representá.
Sindikalismo kier felisitá gerensia, trahadónan di Bonaire Wegenbouw Maatschappij ku den diálogo ku nan sindikato AFBW, teniendo kuenta ku e sirkumstansianan di nos klima e temporada aki, esta temperatura haltu durante dia, a yega na un akuerdo pa adaptá e orario di trabou.
Mi a presensiá e dialogo personal i e forma sivilisá i bon argumentá ku tantu gerensia, trahadó i sindikato AFBW a supstansiá e kambio di orario teniendo kuenta ku tur interes envolví, pero esun ku mas a hala atenshon ta esun di e salú di e trahadó no solamente pa e dianan di kalor pero tambe pa su salú duradero riba largo plaso.
Ku aktividatnan den solo e trahadó ta eksponé su mes nan peligernan di salú pa futuro, kual netamente BWM i sigur sindikalismo kier evitá, esta daño na kueru, daño na bista i otro dañonan. Dañonan pues ku ta afektá bo kuero i ku por kousa hasta kanser di kuero, pero tambe daño di bista kousá pa e rayonan UV ku konsekuensia di katarata i tambe daño na bo sistema di protekshon general di bo kurpa, esta bo sistema inmunológiko.
Bunita tabata tambe ku a duna konseho kon pa protehá bo mes a base di bebe hopi awa i bisti paña di protekshon, ets. ets. No ta BWM so ta eksponé su trahadónan na e kalor inmenso di e temporada, tin otro kompanianan tambe ku nan trahadónan ta traha bou di e sirkumstansianan aki.
Lo ta bon pa nan tuma ehèmpel di BWM i nan tambe tuma e medidanan apropiá den e situashon ku nan ta aden. Ku esaki sindikalismo ta bolbe demonstrá ku nos ta duna hopi atenshon na sirkumstansianan laboral, kual ta bal mes o mas tantu ku kore solamente tras di e kondishonnan laboral primario, esta sèn.
Ku sèn bo por kumpra hopi kos, pero ku sèn bo no por kumpra bo salú. Abo komo trahadó ser konsiente di esei.
FUENTE: NÒCHI WILLEM/LIVE99FM
GIPHY App Key not set. Please check settings